daskor - facebook  daskor - css

Daskor

Pedenn en teñvalded (2)

Genre
Poésie
Langue
Breton
Source
Lorient, Mouladennoù Dihunamb, 1935
Remarques
Nous avons adapté le texte du breton vannetais au breton KLT.
Transcription
Sébastien Marineau
Dans le même ouvrage :

       Bonum est viro si portaverit jugum ab adolescentia sua.
       (Threni, III, 27.)

Me zo ganet e-kreiz ar mor
     Teir lev er-maez ;
Un tiig gwenn du-hont em eus64,
Ar banal ’gresk e-tal an nor
Hag al lann a c’hol65 an avaez.
Me zo ganet e-kreiz ar mor,
     E bro Arvor.

Ma zad a oa, ’vel e dadoù,
     Ur martolod ;
Bevet en deus kuzh ha diglod
– Ar paour ne gan den e glodoù –
Bemdez-bemnoz war ar mor blod.
Ma zad a oa, ’vel e dadoù,
     Stlejour-rouedoù.

Ma mamm ivez a labour[a]
     – Ha gwenn he blev – ;
Ganti, ar c’hwez war hon taloù,
Desket em eus bihanig tra,
Mediñ ha tenniñ avaloù.
Ma mamm ivez a labour[a]
     D’c’hounit bara…

O deizioù ma bugalerezh,
     P’en d-aen, dilui66,
Gant mamm da redek an irvi,
Pe gant ma zad d’ar beskerezh,
’Men67 ez oc’h-c’hwi, ’men ez oc’h-c’hwi ?
O deizioù ma bugalerezh,
     Na dous e oac’h68 !

C’hwec’h ’oamp neuze, Santez Mari,
     War-dro d’an daol ;
Yac’h ha laouen e vevemp holl,
Da Zoue ha Deoc’h e tougemp bri.
Bremañ emañ kemmet an taol.
C’hwec’h ’oamp neuze, Santez Mari,
     N’omp mui ’met tri…

Ar marv war an nor ’neus stoket,
     Deut eo e-barzh :
Hon eurvad zo aet kuit ’n un arc’h
Er vered-parrez da gousket…
Hag ennon e c’hanas69 ur barzh.
Ar marv war an nor ’neus stoket…
     – Ne ouelin ket !

Ne ouelin ket ! Re ’meus ouelet
     Neuze, siwazh !
Ha c’hoant em befe d’ober c’hoazh,
D’ar glac’har ’zo ’tro da’m oaled !
Met ret eo bout kreñv ’vit warc’hoazh.
Ne ouelin ket ! Re ’meus ouelet :
     Eurioù kollet.

Daeroù a zic’hoanag divent
     Em eus taolet
En devezhioù-hont ken kalet ;
Ra vezit benniget ’velkent,
Rak roet Ho peus din ar gweled !
Daeroù a zic’hoanag divent
     Ma amzer gent !…

…Ha bremañ petra ’lârin-me,
     Pa ouzit holl ?
Ma eurvad douarel aet da goll,
Bet ’on er c’hloerdi, en arme,
Baleet ’meus dindan hoc’h heol.
…Ha bremañ petra ’lârin-me,
     Dirak ma Doue ?

Petra ’lârin Deoc’h, o Doue strizh,
     Mor madelezh ?
Ar baourentez zo c’hwerv he laezh ;
Ar bleuñv disec’het ’c’houlenn glizh ;
An douar-mañ zo lous e follezh70.
Petra ’lârin Deoc’h, o Doue strizh,
     ’Met ez on skuizh !

Deut ’on davedoc’h arselin ;
     Diouzh Hoc’h aoter
E klaskan dibun ma fater :
Sklaerderit me hag e welin,
Komzit, ma tañvain Ho touster
Deut ’on davedoc’h arselin
     War ma daoulin…


64 W em es

65 KLT c’holo

66 pe diluz

67 KLT pelec’h

68 W oeh

69 genel, pennrann gan-

70 pe follentezh