un Tammig kaozeadenn etrezomp

Genre
Poésie
Langue
Breton
Source
Guingamp, P. Le Goffic, 1865
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

lenner ha lennerez, kaner ha kanerez 

war don : an hini gozh 

Mar plij deoc’h va sonioù nevez, 
Klaskit de’ tonioù a zoare, 
     Tonioù lirzhin, – Tra, la, la, 
     Tonioù skiltrus, – Tra, la. 

Mar o c’havit re enoeüs 
(Ar pezh a ve din gwall boanius), 
     Rogit al levr, – Tra, la, la, 
     Hep chipotañ, – Tra, la. 

Stlapit-eñ, prim, er fornigell, 
Tanit dioutañ ho kerniel, 
     Pakit, gantañ, – Tra, la, la, 
     Louzoù pe soav, – Tra, la. 

Mailhurit butun ha bloneg, 
Torchit, zoken, ho… fri, ho peg, 
     War se ’vo peoc’h, – Tra, la, la, 
     P’hoc’h eus prenet, – Tra, la. 

Hogen, ho pediñ ’ran ervat, 
Lezit va sonioù en o stad, 
     Ger evit ger, – Tra, la, la, 
     Hep o drailhañ, – Tra, la. 

Dreist pep tra, n’o marellit ket 
Gant brizh brezhoneg Pabored, 
     Brizh brezhoneg, – Tra, la, la, 
     Keginerez, – Tra, la. 

Lezit, mar plij, va bugale 
Er stumm ma ’meus graet anezhe, 
     Hep o gwiskañ, – Tra, la, la, 
     Hep o fentañ, – Tra, la. 

Betek-goût n’o zian’vefen, 
Betek-goût n’o zianzavfen 
     ’Vel bastarded, – Tra, la, la, 
     Flutet e Gall, – Tra, la. 

Ha c’hwi, tud ouiziek-meurbet, 
Gwerzherien flour, barzhed touet, 
[   ]Stlapit ar maen gant ma fri, 
[   ]Mard oc’h glan a fazi. 

Va miserere zo lipet : 
A-raok ! Jabadao kounnaret ! 
     Bombard, binioù, – Tra, la, la ! 
     Sutell, viel, – Tra, la !!!