ar Soudard fougeer

Genre
Poésie
Langue
Breton
Source
Guingamp, P. Le Goffic, 1865
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

FANTIG AN DURKEZ, gwreg ar marichal 
Sellit ! Sellit ! Ar brizh aotroù ! 
Penaos e lugern e votoù ! 
Ur ribot blevek war e benn, 
Keit ha lost ur big e chupenn ! 

DISKAN 
  Kis ! Kis ! ma c’hi, d’ar brizh Breizhad ! 
  Bec’h da gof-gar ar renead* !    [renavi] 

JANED WIN-TOMM, amiegez 
E vlev zo rannet ha flouret, 
E voustachoù ruz zo peget, 
Stummet e giz da higennoù 
Evit pesketa kalonoù. 

DISKAN, Kis ! Kis ! … 

MARGOD HIR-LAÑCHENN,  ostizez
Ur c’houriz glas en e gerc’henn, 
War e zaoulagad div werenn, 
Ouzh e chadenn grizilhonoù, 
War e grabanoù manegoù. 

DISKAN, Kis ! Kis ! … 

JAKETA FLEMM-RUZ, fournierez 
Kaozeal a ra kraoñennek, 
Distagañ ’ra pezhioù gallek, 
E dad a zo monsieur mon père
E vamm, mar plij ! madam’ ma mère

DISKAN, Kis ! Kis ! … 

AN ITRON K. L.,  skolierez 
Betek al loudourenn e c’hoar, 
A zo bremañ, mam’zelle Victoir’
Ma aotroù n’eo ’met un vieil âne
Ha me, une fichue bazane

DISKAN, Kis ! Kis ! … 

METIG AR WIBER, kouezerez 
E dad, ur c’hakous a lignez 
A gign markenned* a zoare,    [skoedoù] 
E vamm a rastell, en hent bras, 
Gant he c’hrabanoù, fiez glas. 

DISKAN, Kis ! Kis ! … 

KATO FRI MINAOUED, gwreg ar c’here 
E c’hoar, foei ! a zo leanez 
E leandi ar Patatez ; 
Ha gwelet hon eus an aotroù, 
E roched lous ’maez e vragoù. 

DISKAN, Kis ! Kis ! … 

LOEIZA MITAOUIK, leanez 
Ne salud person na kure, 
’Vel ur pagan e tou Doue, 
Ne gred ket, tamm, d’an diaouloù, 
D’ar bugel-noz, na d’an teuzoù. 

DISKAN, Kis ! Kis ! … 

MADALEN RAN-TAN-PLAN, gwreg an tabouliner 
Seizh vloaz eo bet soudard brudet, 
War dour Malakoff ’neus kludet, 
Ha panevet n’ouzon petra 
E vije kabiten bremañ. 

DISKAN, Kis ! Kis ! … 

MARTINA BIM-BAON, gwreg ar c’hloc’her 
Atav ! Soudard ! Ur soudard kaer ! 
Soudard (respet deoc’h) an talier ! 
Ar marmouz biskoazh ’neus gwelet ! 
Met tan ar gegin, en oaled ! 

N’en deus gwelet enebourien 
Met war zu gin ar vedalenn ; 
Ma ’neus lazhet  un enebour 
N’eus her beuzet gant un tenn dour. 

DISKAN, Kis ! Kis ! … 

MIKELIG BEG-MEL, plac’h majorez 
Mestrezed a lavar, ’neus bet, 
Ken na ouie pelec’h lammet, 
Ha ranket ’neus skampat dre laer, 
Pe vijent deut d’e heul d’ar gêr. 

DISKAN, Kis ! Kis ! … 

JOBENNIG AR C’HAVR,  dañserez kounnaret 
Ouzh ar vombard ’ra ur sutell, 
Ouzh ar sac’h binioù, ur porc’hell, 
Dañserien ha dañserezed 
A zo ur stroll saout penn follet ! 

DISKAN, Kis ! Kis ! … 

AN HOLL C’HOMEREZED EN UR VOUEZH 
Harao ! Warnañ, prim ac’halenn, 
Kozh kemenerig ! brouder c’hoeñ[v], 
Kerzh da glask da grinolinoù, 
Da strinkerezh ha da louzoù ! 

DISKAN 
  Kis ! Kis ! ma c’hi, d’ar brizh Breizhad ! 
  Bec’h da gof-gar ar renead !