Hirvoudoù ar chaseer

Genre
Poésie
Langue
Breton
Source
Guingamp, P. Le Goffic, 1865
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

    kinniget 
    da’m mab Prosper 
    telegrafier 

war don gallek : La St Hubert 

Gag e pep lec’h ! ha gag bepred ! 
Sier goullo ha min mouzhet, 
Setu petra eo ar chase. 
Ha keuz ’teus c’hoazh d’an didu-se ? 

    **** 
Tan ha kurun ! Luduiñ ’vel kizhier ! 
Ni zo c’hoazh reut, sonn mat war hon elloù ! 
Met ne gav mui netra ar chaseer ; 
Petra ’dalvfe bragal dre ar parkoù ? 
N’on ket c’hoazh moal ! Ma barv n’eo ket loued ! 
’Lies, ’velkent, en deus bervet ma gwad 
Pa selaouen mouezh skiltrus ar chas-red, 
Hag an drompilh o tournial er c’hoad. 
Gwelet am eus an tourc’h-gouez kounnaret, 
En em strinkañ dre greiz ar brouskoadoù, 
Ar yourc’hig, mistr, gant ar spouron follet, 
O tibradañ, uhel, dreist ar bodoù. 
Pelec’h ’int aet, – moc’h gouez ha yourc’hed ? 
An diwezhañ zo darev da vervel ! 
Na chom outo, met kroc’hen direunet, 
Hag eskern kraz, stag ouzh dor ur c’hastell ! 

Ar blev, ar pluñv, holl, siwazh ! ez int boull, 
Ouzh ar gedon, n’en deus hogos hini, 
Ar c’honifled a guzh ’barzh en o zoull, 
Graet eo, pell zo, kañvoù ar c’hlujiri. 
Gedon penn gwenn – ha glujiri koefet, 
Ar re-se c’hoazh, zo stank er parkeier ! 
Paotred diskuizh, diwallit, mar karit ! 
Ar gedon-se a bak ar chaseer ! 

Ni hon eus bet amzer vat koulskoude : 
Tennet, lazhet, karget ’leizh hon sier. 
Tud yaouank kaezh ! Petra ’dapit aze ? 
Logod, razhed, pintiged ha kizhier ! 
Grit eveldon, skourrit ho fuzuilhoù, 
Sant Hubert kozh, hon tad hag hon faeron, 
A zo mouzhet war e skaon, en neñvoù, 
D’hen divouzhañ, kornomp a nerzh-kalon !