ar Fubuenn, lestrig a vrezel

Genre
Poésie
Langue
Breton
Source
Guingamp, P. Le Goffic, 1865
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

war don : Gwennili tremeniad 

  I 

Displeg da astellig ! 
Ma Fubuenn koantik ! 
  Mistr ha kempenn, 
War gribell ar c’hommenn 
Nij, herrus ha skañv ; 
  ’Vel ar gouelan. 

Prim, prim, a denn-askell 
Ma doug eta, pell, pell, 
  Ouzh an douar 
Ken karget a c’hlac’har, 
Ken leun a boanioù kriz, 
  Hudur a bri. 

War da c’horre, mor frank, 
Ne weler ket a fank, 
  N’eus na drezenn, 
Linadenn, na spernenn, 
N’eus ’met an dour, an ne[ñv], 
  Braster… Doue ! 

Pegen brav eo bevañ ! 
Pegen brav analañ ! 
  A-us, heol splann, 
Mor eonus dindan, 
Gourdrouz skiltr an avel 
  Er wern uhel. 

Ho[ !] Pegen stank e red 
Ar gwad, er gwazhied, 
  Hag er galon. 
Dibled, ha dispouron 
A drid sart, ha laouen, 
  Gant ar wagenn. 

Levenez ha didu ! 
Gwelet brav a bep tu, 
  Ar peskig drant, 
Al labousedig koant, 
Lirzhin, o tarnijal, 
  Pe o vragal. 

’Barzh en oabl glan, al loar, 
Da noz, skedus, a bar ; 
  Steredenn gaer 
Patronez ar sturier, 
Ave Maris stella ! 
  Mater alma ! 

Alies e soñjer 
En dousig-koant, er gêr, 
  Er vamm, en tad, 
Ha gant hir huanad, 
An daeroù tomm ha flour 
  A ruilh en dour. 

  II 

Un deiz, pa savo kroz 
War-zu enez ar Saoz, 
  Dispak da flemm ! 
Dispak da flemmig lemm ! 
Gant herr a darzh-kalon 
  Bec’h d’al leon !!! 

Pegen kaer eo mervel, 
Evidout, Breizh-Izel ! 
  ’Kreiz an taran, 
Ha krozmol an emgann ; 
Ar mor glas evit bez 
  Gant gwalc’h Doue. 

Displeg da astellig ! 
Ma Fubuenn koantik ! 
  Mistr ha kempenn, 
War gribell ar c’hommenn 
Nij, herrus ha skañv ; 
  ’Vel ar gouelan.