Distro ar soudard e Breizh

Genre
Poésie
Langue
Breton
Source
Guingamp, P. Le Goffic, 1865
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

    I 
Da welet a ran adarre, 
Va bro garet, Menez Are, – 
Pell diouzhin poan hag enkrez ! 
Tridal a ran gant levenez ! 
 
Gwelet a ran, – pell e draonienn, 
Tour an iliz, er goumoulenn ; 
Ar moged, n’un droidellat, 
O tibradañ ’us ti ma zad. 
 
Klevet a ran ar c’hloc’h sklentin, 
Ar vombard, ar binioù lirzhin, – 
Un eured a zo dre amañ, 
Jadabao ! ebat ! tra, la, la ! 
 
    II 
Demat ! demat ! kamaladed ! 
Gwin ’leizh ar sku’l ! kanomp, paotred ! 
Eurvad deoc’h, priedoù nevez, 
Gant ur c’hrubuilhad vugale. 
 
    III 
Ma mamm ! ma zad ! ma dous Mari ! 
War ma c’halon ! ha start, ho tri ! 
C’hoarzhomp ! gouelomp ! Vad ’ra gouelañ 
Gouelañ, gant eürusted ha joa ! 
 
Sellit ouzhin ! Yac’h-pesk, bepred ! 
’Kreiz an tan ruz, ’kreiz ar c’hleñved, 
C’hwi a viras, Gwerc’hez c’hlan Breizh, 
Ar soudard paour a zalc’h ho feiz. 
 
E Rumengol, deiz ar pardon, 
M’ho trugarekao, Itron ! 
Me ’ray seizh tro d’an aoter vras, 
O kerzhet war ma daoulin noazh. 
 
Ma c’hi Min-Du ! Perak yudal ? 
Na zistroin ken da Vro-C’hall ; 
Ni a raio c’hoazh tro ar c’hoad ; 
’Vit ma’z out kozh, da fri zo mat. 

N’on ken soudard ! Mamm, ma chupenn, 
Paeet eo ma dle d’al lezenn. 
Mari ! Tap krog er sizailhoù, 
Deus da droc’hañ ma moustachoù. 
 
C’hoarzhin a rez ! Ma ! keuz ’meus de’, 
C’hwezh ar poultr a zo c’hoazh gante ; 
Bet ’int skornet, bet ’int ruzet 
Hogen, gant den n’int bet krennet ! 
 
Tavomp war-se, – ur pok bremañ ; – 
Peur an eured ? – Perak ruziañ ? 
Lâr-te da’m mamm, ’zo mamm dit-te, 
’B’oe ’mañ da hini gant Doue. 
 
An hanternoz ! – Prim d’ar gwele ! 
Warc’hoazh vintin, abred ’vo deiz, – 
Ni a yelo, holl, a-vandenn, 
D’ober gweladenn penn-da-benn. 
 
Redek a rafomp ar pradoù, 
Ar parkeier, ar brouskoadoù, 
Gwelet a vo an ebeulien, 
Ar c’hezeg, ar gazeg velen. 
 
Ar saout, al leueoù dizonet, 
Ar c’hole brizh, an ejened, 
Ha (respet d’an neb am selaou) 
Al loen a soroc’h en e graou. 
 
    IV 
Ma ’meus desket un tamm galleg 
’Meus ket dizesket brezhoneg, 
Na ’meus ket ankouaet ma c’himiad, 
kerneod on ! Penn, kil ha troad. 

Piv na gan ma c’himiad er vro ? 
Ra blijo deoc’h ma son distro. 
O ! ’Vit meuliñ hon Breizh karet, 
unanomp hon mouezhioù bepred. 

........................................................ 

  D’AM C’HAMARAD A. BIJON, 
    doktor-louzaouer e Kemperle 

Te a oar fritañ louzoù 
Ouzh droug-kof, remm ha pistigoù, 
Me a ziduell, gant ur son, 
An den gouliet a galon, 
Me ’ra gouelañ, soñjal, c’hoarzhin : 
Em giz, n’on-me ket medisin ?