Chapel Sant Erwan

Rumm
Barzhoniezh
Yezh
Brezhoneg
Orin
Gwengamp, P. Le Goffic, 1865
Evezhiadenn
Reizhet hon eus an doare-skrivañ, ha dalc’het hon eus gant troiennoù orin (ar c’hemmadurioù, ar rannigoù, h.a.).
Treuzskrivañ
Sébastien Marineau
En hevelep levr :

    I 

O tremen ’parrez Kalanel 
En em gavis ’rez ur chapel ; 
Ur chapel savet a-nevez 
Da Sant-Erwan-ar-Wirionez. 

’Us an nor dall zo kizellet 
Skoed DU PARC, aotrounez brudet, 
Gant o ger : Trec’hiñ pe vervel ! 
Ger tud dispouron er brezel. 

Ya ! C’hwi zo bet tudchentil reizh, 
Marc’heien galloudek a Vreizh. 
Pegen kaer e oa ho kwelet, 
Start, taer, war ho kezeg sternet. 

En em strinkañ, ’vel an taran, 
Gant ho kleze dir, en emgann, 
A-raok bepred, sonn ho panniel, 
O krial : Trec’hiñ pe vervel ! 

Ho kwad, ’vel dour en deus redet, 
’Vit gounit bez Salver ar bed : 
DU PARC, eo unan an Dregont 
A drec’has ar Saoz divergont. 

Stourmet hoc’h eus d’ar marv, 
’Vit ar roue, ar feiz, ar vro, 
Marvet, an dorn war ho kleze, 
Ho taoulagad war-zu an ne[ñv]. 

    II 

An amzer, gant e falc’h garv, 
En deus roget ho pannieloù, 
Diskaret tourioù ho kestell, 
Poultrennet eskern ho kernel. 

Hogen, chomet zo koulskoude 
Ur barzh dister ouzh ho lignez, 
Evit kanañ, e yezh Arvor, 
Meuleudioù bras d’hoc’h eñvor. 

  d’an Itron Mari Ange du Parc a Gergadou 

Itron, c’hwi zo merc’h ouzh o gwad, 
Hag hen anzav a rit gant stad ; 
Miret hoc’h eus karantez Breizh, 
Bro al lealded hag ar feiz. 

Deoc’h e kinnigan va gwerzioù, 
Dister, ’vel brug hon menezioù, 
Hag ho kalon wir a drido, 
O klevet heklev ouzh ar vro.