an Teodoù fall

Rumm
Barzhoniezh
Yezh
Brezhoneg
Orin
Brest, P. Gadreau, 1902
Evezhiadenn
Reizhet hon eus an doare-skrivañ, ha dalc’het hon eus gant troiennoù orin (ar c’hemmadurioù, ar rannigoù, h.a.).
Treuzskrivañ
Sébastien Marineau
En hevelep levr :

An teodoù fall o deus graet o labour euzhus ; 
Annaig, ne c’hallimp mui, siwazh ! en em welet ; 
O ! na perak ar fall, o tra ken sebezus ! 
Kentoc’h eget ar mad, a vez atav kredet ? 

Ne c’hallin klevet mui da vouezh ken dudius ! 
Lenn en da zaoulagad a werc’hez, ar glanded ; 
Hiviziken me ’dle, dilezet hag e-kuzh, 
Gouzañv sioulik ar boan graet da’m c’halon rannet. 

Met an dud kriz a c’hall eus va gwalleur c’hoarzhin, 
Eus ar mintin d’an noz, eus an noz d’ar mintin, 
Gant o zaolioù trubard, kreskiñ c’hoazh va gouli ; 

Gant ma gouezin ez out eürus ’vel un Ael, 
Gant ma vo da galir, atav, leun-holl a vel, 
E c’haller, hep ehan, skuilhañ vestl*, em hini.    [bestl]