Mallozh, mallozh warnout, ya, mallozh da viken,
Eus a berzh kement den en deus ar feiz kristen,
Mezventi, mezventi, mezventi milliget,
Binim gwashoc’h eget binim ar chas taget,
Poezon deuet, a-sailhad, eus a buñs an ifern,
A zev ar boull-galon, a vrein mel an eskern !
Ar grevusañ vosenn, ar gwashañ brezelioù,
A zo pell-bras da gaout niver da walleurioù ;
Te ’lazh gwaz ha maouez a-raok hanter an oad,
Hag ar pezh zo skrijus, da vinim, aet er gwad,
Eus ur rumm d’egile gwriziennet er gwazhied,
Eus ar vugale geizh a ra kornandoned.
N’eo ket hepken d’ar c’horf an tech hudur, siwazh !
A ra droug, euzh ha spont, d’an ene gwashoc’h c’hoazh,
D’ar re zo war ho tro, kerent ha mignoned,
Pere gant ho skouer fall en enkrez zo bepred.
Nag a diegezhioù kaer, n’eus ket pell c’hoazh brudet,
Gant tech ar vezverien a zo buan diskaret !
Nag a vugale fall, en ur en em vezviñ,
A ra mezh o c’herent en amzer o c’hozhni !
Rak tan ar gwin-ardant, a-boan ma sav d’ar penn,
Ma c’houezh ar youlloù lous e kof an den ouzhpenn.
Mallozh, mallozh warnout, ya, mallozh da viken,
Eus a berzh kement den en deus ar feiz kristen,
Mezventi, mezventi, mezventi milliget,
Binim gwashoc’h eget binim ar chas taget,
Poezon deuet, a-sailhad, eus a buñs an ifern,
A zev ar boull-galon, a vrein mel an eskern !