an Evurusted

Genre
Poetry
Language
Breton
Notice
The spelling has been modernized, but some forms (mutations, verbal particles...) has been kept.
Further details
Kroaz ar Vretoned, 14/07/1912
Transcription
Sébastien Marineau
In the same work :

Ma nerzh ha ma amzer, en aner ’meus kollet, (bis)
’Klask tizhout un teñzor ha n’am eus ket kavet, o. (bis)

An teñzor-se hep priz, anvet evurusted
A lak hirnezh ha spi e pevar c’horn ar bed, o.

D’hen klask am eus furchet, e kêr ha war ar maez.
Dre-holl am eus kavet hirvoudoù hag enkrez, o.

Da zastum madoù bras e poagnis da gentañ,
Dastum a ris gante an trubuilhoù gwashañ, o.

Gant ar plijadurioù am eus hen goulennet,
C’hwerventez ha daeroù ganin o deus lezet, o.

Troet am eus ma sell war-zu an enorioù,
Met o douster lorc’hus a wask ar c’halonoù, o.

Furchet am eus ivez kalon meur a vignon,
Biskoazh n’am eus kavet ur garantez wirion, o.

Danvez, plijadurioù, enor, falz karantez,
O levenez gwalc’hus ’neus trenket ma buhez ! o.

Madoù ha joa ar bed, ’vel bezioù ar vered,
Dindan bleunioù a guzh breinadur ha preñved, o.

Levenez an douar, ken skedus en dremmwel,
Pa dostaer dezhi a deuz dirak ho sell, o.

Ar gwir evurusted n’eo ket eus ar bed-mañ :
Poaniomp dont d’an Neñvoù ’vit kavet anezhañ ! o.