Nouel neuez voar ton Ganet eo remet

  497
Nouel quenomp, na fellomp quet,
Dre vuheltet a gaudet hetus,
Da Iesus quer, Saluer an bet,
Ha de mam a pret so quenedus ;
Quenomp yoaius hep refus tam ;
Lamet omp a rest hac estlam.

  498
Eua hep ezom a trompat ;
Allas ! pell en he stat ne padas 
Maz torras gourchemen Doue’n Tat ;
Vn goal huanat pan trellatas
Rac pemp mil bloaz, an annoazdet,
E troit* an goalch ez viomp dalchet.  [lisez eguit]

  499
  Truez en deffoue Roue’n effaou
Ouz hon caffaou, pa en doa sezlaouet,
Digac remet en hon metaou
A prederas, hep gaou ; enaouet
Euit dastum natur humen,
Prenaff heritaig imaig den.

  500
  Incomprehensibl, terribl voe
Maz offensat Doue hon guir Roue ny ;
Den en douar ne reparse
An faut se plen a nep seurt heny :
Deuet eo Map Doue beu an effaou ;
En deuz rentet scaff hon caraou*3.  [lisez cauaou]

  501
  Mary vo’en merch l’eun a guerchdet,
Predestinet ha choaset detry,
Da Ioseph yuez dymezet,
Cals un den parfet, ha na gret sy ;
Hy voe deuffry a meritas
Bout mam da Doue nep hon croueas.

  502
  En Galilee splan un cannat,
A perz Doue’n Tat a digacat sur,
Da dezraou un quehezlao mat
Euit netat hon tat* a natur :  [lisez probablement stat  ; cf. pourtant la strophe 457] 
Gabriel, vuhel, an Eal bras,
Mary hep brut a saludas :

  503
  – Ave, hep nep sy, Maria,
A gracc ha yoa out l’eun a tra scler
An Autraou splet guen ez e ma ;
Cret an dra man hep quet douetaff guer.
Vn map hep poan te a gano,
Iesu yuez hanuet vezo. –

  504
  Souezet voe pront hac ez spontas
Maz lauaras, ha ne tardas quet,
Pe en fecçon, dre raeson bras :
« Bizcoaz a goas ne vioff tasset.
– Mary, na douet, an Speret Sant
En ot certes a duy presant. »

  505
  Mary presant a assantas,
Ha dan Eal bras ez lauaras pur :
– Volontez Doue nep an* croueas,   [lisez am] 
En andret an cas, bezet assur ;
Me a so haznat e matez
Ha bepret pront de volontez. »

  506
  An Map man buhan so ganet
Et Betzleem eo deuet don remedy
Ha tut a enor, pastoret,
Hep nep arret so dyredet dy ;
Deuet int cuff vuhel da guelet
Jesus Map Mary beniguet.

  507
  Rouanez try diouz Orient
A het an hent no deuez lentet,
En em caffas en un croas hent
Oz clasq Roue’n sent, hep fent, ententet,
Tut a fecçon donesonaou
A profsont da Doue Roue’n effaou.

  508
  Iesus fier Saluer an bet
A so ganet, deuet en hon metaou ;
Gant aff omp an lym redimet,
Hac effacet deomp hon pechedaou ;
Deuet eu, hep gaou, da dezraou poan,
Da prenaff sazun pep unan.

  509
Allas ! Mary, ny oz suply ten,
Doz Map Roue’n glen chuy gray pedennaou :
Hep nep goap bed’ en couabren :
« Hon oll Reys, cren, han offerennaou ! »
Pedet, Mary, a deury hel,
Naz chencymp guys en Breiz isel.