daskor - facebook  daskor - css

Daskor

XL – Natur humen un den he alienas

Genre
Divers
Langue
Moyen-Breton
Source
Revue Celtique
Remarques
Nous avons conservé l’orthographe d’origine.
Précisions
Edition par Théodore Hersart de la Villemarqué dans Revue Celtique, XIII, pp. 126 et ss., d'après l'imprimé Y 6187 de la Bibliothèque nationale de France : "an Nouelou ancien", de Dom Tanguy Guégen, Quimper, 1650
Transcription
Sébastien Marineau
Dans le même ouvrage :

  476
  Natur humen un den he alienas ;
Natur humen Map Doue ha den he prenas,
A chuen en croeas ; un pas ne fallas quet,
  Nouel quenomp entromp, na fellomp quet.

  477
  Adam expres certes voe a transgressas
Gourchemen Doue ha hon Roue nep hon croueas
Dr’en auall glas a debras en goasquet.
  Nouel quenomp entromp, na fellomp quet.

  478
  Trompet ifam voe, credet flam, hon mam ny, 
Dybr’in aual, disleal, dre drouc aly,
Reyff da dibriff a deury de priet.
  Nouel quenomp entromp, na fellomp quet.

  479
  Vn clezeu guen a diouz ho pen a tennat
Euit hon dle pell cre en hoz chaceat ;
Goal huanat gant Doue’n Tat debatet !
  Nouel quenomp entromp, na fellomp quet.

  480
  Suget hep sy a deury da Lucifer
Viomp dre ho blam, ma credet flam, un amser,
Oz gortos quer seder Saluer an bet.
  Nouel quenomp entromp, na fellomp quet.

  481
  A Nazareth assuret credet detry
Vn guir cannat haznat a digaet* dy  [lisez digaçat] 
Dr’en Roue’n velly bet Mary beniguet,
  Nouel quenomp entromp, na fellomp quet.

  482
  Sant Gabriel voe an Eal a reuelas
Da Mary, hel, peur santel pan he guelas,
An Myster bras pe da cas voa choaset.
  Nouel quenomp entromp, na fellomp quet.

  483
  Tuzmat onest ez deuez prest, hep contestiff, 
Bed’ en Guerches euyt certes expressif
Ez ganse hy hon Roue [ni] beniguet.
  Nouel quenomp entromp, na fellomp quet.

  484
  – Saluer an bet, Mary, na douet an fet man,
A disquenno en ot dre an Speret glan, 
Yuez hep poan buhan da bout ganet.
  Nouel quenomp entromp, na fellomp quet.

  485
  – Allas ! Eal mat, dereat hep debaty,
Chuy comps tra bras ; bizcoaz a goas fantasy
N’emboue, deury, a heny na priet.
  Nouel quenomp entromp, na fellomp quet.

  486
  – Lesell so ret an oll pep douet ha cridiff,
Rac goude, spes Rouanez, guerches vizy ;
Dre maz aedy hep sy profficiet :
  Nouel quenomp entromp, na fellomp quet.

  487
  – Volontez Doue, ma guir Roue ha ma Crouer,
Em andret flam gret dinam e pep amser ;
Bezet seder euel mae discleriet.
  Nouel quenomp entromp, na fellomp quet.

  488
  An Guerches man, certen hep poan a ganas
Tost da un asen, allas ! * hac un eugen bras ;  [lisez tost, allas ! da un asen] 
Nep hon croueas ne caffas quen goasquet.
  Nouel quenomp entromp, na fellomp quet.

  489
  Tiz cuff vuhel dre an Eal voe reuelet
Da un lot cosquor, tut a enor, pastoret,
Dre guir gaudet dont santel de guelet.
  Nouel quenomp entromp, na fellomp quet.

  490
  O pebez fest, pez tempest nac onestys
A great, credet, oz dont dauet Roue’n bedis,
Joayus pep guis ha ho languis quiset.
  Nouel quenomp entromp, na fellomp quet.

  491
  Rouanez try a deury diouz Orient
En em caffas gant joa bras en un croashent
Oz clasq Roue’n sent ez oant, quent ententet.
  Nouel quenomp entromp, na fellomp quet.

  492
  Maz quefsont cre Jesus Map Doue, Roue neffaou,

Hac y auancc, hep quet douetanc, offrancaou ;
Esancc hac aour, myrr, hep gaou, sezlaouet.
  Nouel quenomp entromp, na fellomp quet.

  493
  Vn spacc certen an Map man plen a regnas 
Dre meur anquen han maru yen hon dazprenaz

A chuen en croas ; un pas ne fallas quet.
  Nouel quenomp entromp, na fellomp quet.

  494
  Ny a calon oll, tut guirion, Leonis,
A guir gaudet greomp requet da Roue’n bedis,

Bourch na ploueis dre nep guis na quiset.
  Nouel quenomp entromp, na fellomp quet.

  495
  Deuet eo Jesus, hon excus ne refuso,

Nep dre peden ha pinigen en menno ;
Hon pardono un dro ; ne fallo quet.
  Nouel quenomp entromp, na fellomp quet.

  496
  Jesus, Map Doue, ha diuoe guir Roue an Tron,
Ouz pep encres cleuet spes hon oraeson,
Roue’n anaffoun, pobl Leon pardonet.
  Nouel quenomp, entromp ; na fellomp quet.