daskor - facebook  daskor - css

Daskor

XXXIX – Goude pep anquen, estrenuan, syouaz ! …

Genre
Divers
Langue
Moyen-Breton
Source
Revue Celtique
Remarques
Nous avons conservé l’orthographe d’origine.
Précisions
Edition par Théodore Hersart de la Villemarqué dans Revue Celtique, XIII, pp. 126 et ss., d'après l'imprimé Y 6187 de la Bibliothèque nationale de France : "an Nouelou ancien", de Dom Tanguy Guégen, Quimper, 1650
Transcription
Sébastien Marineau
Dans le même ouvrage :

  468
Goude pep anquen, estrenuan, syouaz ! hon boa, ha poan calet,
Allas ! dre fet pechet Eva, hon mam quentaff, ez oamp clauet.
En kaer a Bezleem ez deuz deomp remet pan voue ganet, na lequet sy,
                    Iesu Roue’n douar, gant Mary.

  469
Vn steren en aer an sclerhaff, da testyfiaff quentaff pret,

A deuz seder en quarter man a dyouz heman, pan voe ganet,
Ha tut a enor, cosquor pastoret, a deuz de guelet a pret mat ;

                    Dre an Eal guen ho quemennat.

470
En merchaucy, en ty dyfflas ezo’an Messias, allas ! deuet,

Oz hars un eugen, voar fouen glas, nep hon croueas, hep quen goasquet !
Try diouz Orient, hep fent, ententet a deuz de guelet, credet se,
                    Cheuancc, contant, presant gant e.

  471
Gant stat ha madaou ez stouent hac en henorent quezquent tra,
Pront ho tensor a digorent dezaff oz offrent maz grent joa,

An try Roue parfet, ha ho souhet oa, en Iudea po doa caffet

                    Iesus fier, Saluer an bet.

  472
  Vn Roue, Herodes, n’en deussy, gant auy voe melconiet
Oz bout ganet den nep heny euyt regny maz gouyhet,
Maz geure, syouas ! ez vise lazet an Innocantet, credet, oll,
                    Oz clasq an Map man oar an oll.

  473
  Enoromp Heman, tut an bet, gant Pastoret dre requetaou
Hep ehan gant an Rouanez proffomp yuez, pouent ez dezraou ;
Greomp dezaff offranc hon conciançaou hac a vertuziaou euraou mat
                    Ha ho caffymp, pan chenchimp stat.

  474
  Na vezet certen nep heny na gray meuleudy a lies
Pep enor ha gloar da Mary ; pa ne ve hy ez oamp dies ;

Sur ez eo haznat hon Aduocades ha hon Maestres courtes, plesant ;
                    Den ne pet cre e pour neant.

  475
  Enoromp hy da bizuiquen entromp, christenien, ha quanomp
Nouel, hep gaou, de Map laouen gant aff bizuiquen maz renhomp.
Pardonnet yuez dr’en fez maz vezomp, pan deceuomp, pan meruhomp scaff
                    Oll, goude hon fet en bet man.

  Amen