daskor - facebook  daskor - css

Daskor

XXXVIII – Quenomp cuff vuhel Nouel da Roue’n Aelez

Genre
Divers
Langue
Moyen-Breton
Source
Revue Celtique
Remarques
Nous avons conservé l’orthographe d’origine.
Précisions
Edition par Théodore Hersart de la Villemarqué dans Revue Celtique, XIII, pp. 126 et ss., d'après l'imprimé Y 6187 de la Bibliothèque nationale de France : "an Nouelou ancien", de Dom Tanguy Guégen, Quimper, 1650
Transcription
Sébastien Marineau
Dans le même ouvrage :

Nouel neuez voar ton Ut queant laxis

  454
  Quenomp cuff vuhel Nouel da Roue’n Aelez

So deuet en bet man breman en byhanez
Palamour don rest, an fest na aruestomp ;
          Hep ehan canomp.

  455
  Oll ez oamp collet hep remet en bet man
Palamour da daou, voamp en gaou ha saouzan ;

Pan eo deuet Map Doue ha diffoue hon Crouer,
          Gant mall, hon Saluer.

  456
  Re quent ez sentas seder pan quemeras
Eva hon mam oll (dre bout foll hon collas)
En aval calet pan voa cren diffennet,
          Pe garu ez maruset.

  457
  Gant auy sigur voe sur maleurus
Ez deuez an sarpant mechant ha truenaus* [lisez truantus] 
Da deceu an hat hac hon tat a natur ;
          Cas bras, moz assur.

  458
  Adam ifammus, confus em excuse,
Da Eva gant mall an gouall a tamalle ;
Neuse ves an placc dygrac viont cacet,
          Pell cre chacceet.

  459
  Nech dre ho pechet, hep quet fent, ententet,
Ho deffue pell bras ; da poan glas viont tasset,

Vagabond pep hent, nep ty ne habitent ;
          Hep floig ez loigent.

  460
  Joachim estimet den parfet a creden,
Hac Anna expres guyr Maestres an lesen,
Ho deffoue un merch euel erch, ha guerches,
          Caezr impalaezres.

  461
  Scriffet, credet hel, gant Hely, peur fier,
Voa ez vise mam peur dinam un amser
Da quer Map Doue ’n Tat, ha he stat a patse,
          Guerch glan ez manse.

  462
  Tiz, cuff hac vuhel, an Eal a reuelas ;
Da houman hegar, hep mar, ez lauaras :
« Ave, Maria ; graec, laouen, out plena ;
          Cret flam an dra man.

  463
  An eil Person din, a peutrin an Drindet
Ez corff, Mary guen, so da bout disquennet,
Ha guerches vizy hep sy da bizuiquen ;
          Cret ferm an termen.

  464
  Neuse, gant joa bras presant ez assantas,
Ha dan Eal clouar, hep mar, ez lauaras :
« Me so da Roue’n ster seder seruicheres ;
          Pront de volontez. »

  465
  Mary, credet glan, hep nep poan a ganas
Jesus Doue ha den dre anquen hon prenas,
Rac ez uaruas ; e goat puill a squillas,
          Nep lom ne chommas.

  466
  Vuhel, en croas pren, quen ten en astennat ;
Gant tachaou, daou, try, quen deury en gryat
Palamour don rest e aruest voa eston
          Auancc hon rancon.

  467
  Requetomp heman hep ehan damany
Entromp, pobl breton, dison, don pardony,
Pan duy an termen ; bout franc a pep anquen,
          Ha hep blam. Amen !