daskor - facebook  daskor - css

Daskor

XXXVI – Ganet eu Doue, Roue pep noueancc…

Genre
Divers
Langue
Moyen-Breton
Source
Revue Celtique
Remarques
Nous avons conservé l’orthographe d’origine.
Précisions
Edition par Théodore Hersart de la Villemarqué dans Revue Celtique, XIII, pp. 126 et ss., d'après l'imprimé Y 6187 de la Bibliothèque nationale de France : "an Nouelou ancien", de Dom Tanguy Guégen, Quimper, 1650
Transcription
Sébastien Marineau
Dans le même ouvrage :

Nouel neuez voar ton Christe redemptor

  433
Ganet eu Doue, Roue pep noueancc ; deuet eu dre chanc don auanc oll ;
Da dezraou poan ez eu ganet. Rac se, moz pet, sezlaouet oll.

  434
Vn merch clouar hanuet Mary a voe hep sy occasion
Don lamet, allas ! a casty, digac deomp ny redempcion.

  435
  En Bethleem credet, ez aedy ganet gant Mary beniguet
Map Doue, Roue’n bet, credet hegar, Jesus hep mar a Nazaret.

  436
  Gant cals a enor, pastoret pan voant quelennet, so deuet dy
Jesus abaff p’o doa caffet n’en doa neubet ho meuleudy.

  437
  Vn steren quen brao a sauas ha try Roue bras, me hoz assur,
De clasq en diuez ez deuzont, ne paouesont n’en quefsont sur.

  438
  Enor, hep douetancc, offrancaou a profsont hep gaou, sezlaouet,
Aour ha myr spes, ha cals esancc ouz pen forz cheuanc auancet.

  439
  Neuse Herodes peur hesent, ganet Roue’n sent pa ententas,
A voe claff bras gant fantasi ; vn frenesy en saesyas.

  440
  En ker a Bethleem hep remet ez voe lazet, notet an cas,

An Inocantet a detry oz clasq deury an Messias.

  441
  O pebez leuff bet’ en effaou a yoa gant mammaou caffaouet !
Ho bugale a dene choaz ! n’en doant quet bloaz ! ha o lazet !

  442
  Buhan dren Eal voe reuelet da Joseph, credet, hep douetaff,
Mont gant Roue’n bet ez az ient cuit pront en Egypt, dem acuitaff.

  443
  Eno seiz bloaz en annoaz yen ez viont certen oz reynaff ;

Deze, credet, quemennet voe, dont a darre en Iudea.

  444
  Tourmentaou bras, bezet assur, euid omp sur a anduras

Jesus ; credet stanc, gant anquen en croas, a chuen, hon dazprenas.

  445
  Saluet vihomp, mar queromp, oll, den a ve foll mar em colle,
Rac dre merzer Saluer an bet en deues bet paeet hon dle.

  446
  Unvoan, commun, guytibunan pedomp breman, na ehanomp
Euit hon ren da leuenez, pardonet yuez maz vezomp.

  447
  Rouanes spes an santesaou, chuy, hep quet gaou, hon sezlaou ny ;
Ny hoz requet, pedet, Ytron, Iesus Roue’n Tron don pardony.