XXIX – Nouel quenomp, na fellomp quet
- Préface de Th. Hersart de la Villemarqué
- I – Nouel ! Nouel ! E quentel don guelet…
- II – Nouel ! Quenomp, joaeusomp glan !
- III – Quenomp Nouel da Roue’n Aelez
- IV – Quenomp cuff vuhel Nouel da Roe’n velly
- V – Quenomp Nouel vuhel da Nedelec
- VI – Nouel ! Nouel ! Nouel !
- VII – Nouel spes da Iesus !
- VIII – Nouel ! Nouel ! Nouel !
- IX – Nouel ! Quenomp ha greomp joa !
- X – Ganet eo Doue, Maestr ha Roue pep noeancc
- XI – Quenomp ha bezomp hael ! Nouel da Roue’n Aelez
- XII – Nouel ! Nouel ! Da nedelec
- XIII – Lauen quenom entromp, na fellomp quet
- XIV – Nouel vuhel mat da Doue’n Tat hep atfer !
- XV – Nouel da Roue’n effaou, laouen
- XVI – Nouel ! Nouel ! Nouel ! Nouel !
- XVII – Quenomp Nouel da Roue’n Aelez gant feiz…
- XVIII – Quenomp Nouel ! Nouel santel dre vuheltet
- XIX – Quenomp Nouel ! Nouel ! Nouel !
- XX – Nouel ! quenom glan, breman, pobl an bet
- XXI – Nouel ! Dre feiz reiz, an guez man
- XXII – Nouel, Nouel, Nouel ! sant Gabriel, Eal Doue
- XXIII – Quenomp Nouel vuhel ha frez
- XXIV – Quenomp Nouel dre vuheltet
- XXV – Nouel ! Nouel ! Alleluya !
- XXVI – Nouel ! Nouel ! Nouel ! quenomp dre vuheltet
- XXVII – Nouel quenomp ha greomp joa
- XXVIII – Nouel quenomp, na fellomp quet
- XXIX – Nouel quenomp, na fellomp quet
- XXX – Greomp ny gloar a memoar da Mary
- XXXI – Nouel ! Quenomp glan breman, pobl an bet
- XXXII – Nouel ! Nouel ! Nouel ! Nouel !
- XXXIII – Goude an poan, han doan han huanat a preparat don tadaou
- XXXIV – Quenomp cuff, vuhel, Nouel dan Buguel frez
- XXXV – Quenomp Nouel da Roue’n Aelez deuet eo an dez a neuez flam
- XXXVI – Ganet eu Doue, Roue pep noueancc…
- XXXVII – Ganet eo remet dan bedys
- XXXVIII – Quenomp cuff vuhel Nouel da Roue’n Aelez
- XXXIX – Goude pep anquen, estrenuan, syouaz ! …
- XL – Natur humen un den he alienas
- XLI – Nouel quenomp, na fellomp quet
- XLII – Nouel ! Nouel ! Nouel ! quenomp hel da Roue’n Aelez
- XLIII – Iesus Roue’n effaou a so deuet ouz traou man
- Additions et corrections
Nouel pe a heny an ton so commun
361
Nouel quenomp, na fellomp quet,
Da Rouanes an guercheset
A ganas Map Doue, guir Roue’n bet,
Hep coll he guerchdet a netra :
Greomp meuleudy da Maria.
362
Mary din a predestinat
Dreyst quement sygur a furmat
Da bout mam Iesu a tu mat :
Ha pur ha mat, hegarataff.
Greomp meuleudy da Maria.
363
Adam dre un tam hon lammas
Oll a gracc Doue nep hon croueas ;
Map Mary flour hon sycouras
Ha hon lammas an poan brassa.
Greomp meuleudy da Maria.
364
Ret voa en hirvout hep souten
Mont dan citern an Ifern ien
Paz eo deuet Mary peur dien ;
Dreiz y pep den a laouhenna.
Greomp meuleudy da Maria.
365
Jesu Map Doue, guir Roue an bet,
Dre myster diuin an Drindet
A corff un Guerches, Maestres net,
A so deomp ganet, caezrhet tra !
Greomp meuleudy da Maria.
366
Hac an Speret glan dammany
A deuez hep mar bete Mary,
Han Eal yuez a comps dezy
A deuffry : Ave, Maria.
Greomp meuleudy da Maria.
367
Map Doue hep poan a voe ganet
Gant un merch glan, Mary hanuet,
En paurentez heruez an bet
Da douen hon penet, ha pret voa.
Greomp meuleudy da Maria.
368
An Aelez glan gant letany
Da meuliff Doue, hon guir Roue ny
A deuez hep mar bete Mary
Hac ez canent [y] Gloria !
Greomp meuleudy da Maria.
369
Tut plen a enor, Pastoret,
Pan voant dr’en Eal guen quemennet
A deuez en quentel de guelet
Gent joa meurbet, me a creta.
Greomp meuleudy da Maria.
370
En Rom, en Templ, dre essempl din,
An nos se, sclaer hac anterin
Ez aez en pep tu en ruin
An Idol fin Appolina.
Greomp meuleudy da Maria.
371
Rouanez try a Orient
En en caffas en un croashent
Oz clasq Map Doue, guir Roue an sent,
Hac out aff hep fent ez grent joa.
Greomp meuleudy da Maria.
372
Un steren guen ho quelenne
Pep unan pront diouz e contre,
Euit proff hep goap da Map Doue
Bed’en cite a Iudea.
Greomp meuleudy da Maria.
373
Reiff da Map Doue dre auoeancc
A gresont diuin forz financc,
Aour ha myr espres hac esancc
Dre ho scianc ho offranc voa.
Greomp meuleudy da Maria.
374
An Rouanez a yoa bezet
En ty Herodes expresset
Oz goulen glan maz oa ganet
Saluer an bet na maz edoa.
Greomp meuleudy da Maria.
375
Buhan diligant pan santas
Ho lazaff ho try a spias ;
Hoguen Roue glen ho diffennas,
Deze dre cas na noas netra.
Greomp meuleudy da Maria.
376
Escuit euit ho iscitaff
Na distrosent quet davet aff,
Ez deuez Gabriel, an Eal scaff,
Miret ount aff an guelhaff voa.
Greomp meuleudy da Maria.
377
Pedomp Roue’n nouar, Map Mary
Ha maz ay hep goap dan abry
Holl pobl Leon hep essonny
Ad paradisi gaudia.
Greomp meuleudy da Maria.