daskor - facebook  daskor - css

Daskor

XIV – Nouel vuhel mat da Doue’n Tat hep atfer !

Genre
Divers
Langue
Moyen-Breton
Source
Revue Celtique
Remarques
Nous avons conservé l’orthographe d’origine.
Précisions
Edition par Théodore Hersart de la Villemarqué dans Revue Celtique, X, pp. 288 et ss., d'après l'imprimé Y 6187 de la Bibliothèque nationale de France : "an Nouelou ancien", de Dom Tanguy Guégen, Quimper, 1650
Transcription
Sébastien Marineau
Dans le même ouvrage :

Nouel voar ton Ut queant laxis

  178
Nouel vuhel mat [da] doue’n Tat hep atfer !
Ha de Map, hon Doue, hon appoue, hon Crouer,
Ha dan Speret sant omnypotent antyer ;
                    Saluer e querent.

  179
Seyz pemp mil blyzyen en anquen ha penet
Ez voe hat Adam ; iffam ez voe blammet,
Rac dybri naual en diffoue poan calet,
                    E saouzan manet.

  180
Porz an Barados deiz nos a yoa closet ;
Da nep seurt cosquor an nor ne dygoret ;
An ol anaffoun a ioa abandonnet.
                    Ha tout hyrvoudet.

  181
Certes, hep espern, en Iffern a bergnaou
Ho quacet en poan ha queynuoan dan tan glaou ;
Euyt un pechet, dalchet en arretaou,
                    En glachar, voar naou.

  182
Ha dre gracc diuin anteryn an Dryndet
Ez eo deuet Iesus, dre e gracyusdet,
De nem laquat den, en ancquen ha penet,
                    Na vemp oll collet.

  183
Pan deuez e Mary, hou Roue ny, Messias,
An Eal Gabriel dezy en reuelas ;
Guerches voa houman an Map man pan ganas,
                    Ha glan ez manas.

  184
Maz comse’n Eal guen dezy pan quemenne :
« Mary beniguet, guen da bet, ha cret se :
Te a conceuo un dro a gano Doue
                    So guiryon hon Roue. »

  185
– Da Doue, emezy, Mary so dediet ;
Me so e matez, dr’en leuerez, bezet. »
Neuse Roue an euff so enn y conceuet,
                    Dreyst natur furmet.

  186
En craou an loeznet ez voe ganet certen
Hogos da Iosep, en un presep hep quen ;
Sur hep mailluraou na trezyaou, en craou ien,
                    Iaouanc en anquen !

  187
Allas ! tut an bet, contemplet, na gret quen,
En poan en deffoue, – euyd omp voe, – Doue den

Bete maz maruas dyfflas en croas a chuen,
                    Dre hon blam. Amen !