daskor - facebook  daskor - css

Daskor

XIII – Lauen quenom entromp, na fellomp quet

Genre
Divers
Langue
Moyen-Breton
Source
Revue Celtique
Remarques
Nous avons conservé l’orthographe d’origine.
Précisions
Edition par Théodore Hersart de la Villemarqué dans Revue Celtique, X, pp. 288 et ss., d'après l'imprimé Y 6187 de la Bibliothèque nationale de France : "an Nouelou ancien", de Dom Tanguy Guégen, Quimper, 1650
Transcription
Sébastien Marineau
Dans le même ouvrage :

  169
Lauen quenom entromp, na fellomp quet,
Guytybunan, gant dyboan, pobl an bet,
Dre vuheltet parfet, a caudet hell :
                    Nouel !
Dan goar Mary meuleudy a lyes !
An Itron mat, hon guir aduocades,
Glan Rouanez an pales celestel.

  170
An Guerchez man quen glan a voe ganet,
Quen anteryn ha din oryginet,
Quen mat, quen net, quen parfet a detry,
Hac excellant ha vayllant pep andret,
Dre he* quen pur ne voe assur furmet  [probablement pour nep tra] 
A vuheltet goarnisset, na gret sur*.  [lisez sy]

  171
Dren madelez han humblez a nezy
Ez dycaçat un cannat dauet y
En gueffrydy an ty celestyell,
Dyrac he facc dre gracc a legacy.
Maz voe meurbet maruaillet, na ret sy,
Pan guelas hy diraz y Gabriel.

  172
Neuse an Eal vuhel pan he guelas
Hep goap na brut astut he saludas
A comsaou bras ; hac a lauaras sur :
« Mary dynam, merch flam, na estlam quet,
Rac ez corff guen ez eo cren dysquennet
Iesu Roue’n bet, da bout net ganet pur.

  173
Map Doue an Tat, e grat, e pligadur,
A commer quic en och, merchic, figur
E gallout pur, e statur naturel. »
Pan ententas, dan cas ez voe assant
An Guerches sclaer antyer ha reuerant,
Deuotamant cals plesant ha santel.

  174
Hy en dougas, hep noas, gant habaster
En he corff flam dynam, un spacc amser,
Iesu, Roue’n ster, hon saluer souueren,
Ne contom pas un pas ne goazhas hy ;
Merch ha Guerches, Maestres a courtesy
Dreyst pep heny ez manas hy dyen.

  175
Maz deuez, hep fabl na goap, an Map a plen
Nos Nedelec, doucc ha chuec ne voe quen,
Voe an termen a certen de guenel
Ha dan heur se maz care de dyuys
Ez voe ganet, credet, entr’en bedys,
En lech dysprys, dizcoantys, a isel.

  176
Pan voa ganet, parfet gant meuleudy,
Ez deuez gueffret de guelet, ne gret sy,
Rouanez try dyouz party Orient,
De visitaff ha de enoriff glan ;
Han Pastoret parfet, hep sellet poan,
Guytybunan gant dyboan ez canent.

  177
Ha goude se, quentre caras, asquet
Plen ez reonas, pell bras ne fallas quet ;
Ha pan voe pret, – ententet e quentel, –
A chuen en croas ez maruas a tra scler
Dre caret den, gant ancquen, dezguener
Hon Dasprener, hon Saluer eternel.