Nouel pe a heny an ton so commun

  137
Ganet eo Doue, Maestr ha Roue pep noeancc ;
Dre hon pechet ez eo deuet, caezret chancç !
En penitancc da auancc hon rancçon,
Flam don lamet a morchet maz edoamp :
Rac se pep guis, fournys, reyouysomp ;
Nouel ! gueluomp, canomp, drez quelhomp son,
          Da Roue’n tyr guiryon ;
          Dre affection,
          Don dyprisoniaff
          So deuet en lym,
          Hep goap, dan abym,
          Da douen poan hon crym
          Ha don redimaff.

  138
An Proffedet, en penet caletaff,
A ioa en cry, hac y oz suppliaff,
Oz hiruoudaff, oz songaff bezaff ret
Cacc pep eneff diadre[f] da leuffal
E mil tourmant, suramant, ha scandal
Dre un aual, ractal, dan teualtet.
          Roue’n tyr don miret
          So breman ganet ;
          Diguacçet entromp
          Ha deuet, caezret guis,
          Remet dan bedis
          Ha ma chencho guis
          Fournys de guysion.

  139
Un merch guerches, courtes, leun a raeson,
Carguet detry a pep perfection
A voe moyen da Roue’n Tron da donet
Rez entrezomp ; mar queromp ez omp ny
– Dr’en aual glas mar bras vo’en fantasy –
Ouz Roue’n velly gant Mary alyet.
          Pan voamp oll collet
          Dre Adam blammet
          Dre fet pechedaou ;
          Deuet en Map a pret
          Breman, voar an bet,
          A blam don lamet
          Net a pechedaou.

  140
Nos Nedelec, doucc ha chuec, n’en de gaou,
Mary dinoas a ganas peur hasaou
Hon guir Autraou, hep goulaou enaouet,
Na bezaff trist ; quen fin mistr ha cristal,
Ez ganas hy hon Roue ny special
Hep ty na sall, entr’en aneualet.
          Gant azlan loeznet
          Rez e goarezet.
          Clet de goasquedaff,
          – Sauff laez de maezur –
          Nep dillat natur
          Ne cafset quet sur
          Pur de mailluraff.

  141
Pan voa ganet, ne fel quet e douetaff,
Ez deuez an ear han caer da bout sclerhaff,
Da goulaouaff, da veza quentaff test.
Da hanter nos, pan voa hogos closet,
En gouabren un steren quezquen net
A voe guelet, estimet, credet prest.
          Pastoret, me dest,
          Dre didin, ez grent fest,
          Dre ma test an Istoar.
          Da guelet, – chetu, –
          Roue’n bet, caezret hu ! –
          Drez deuent, ez grent hu,
          En nos du, dr’en ruaou* !  [probablement pour ru kear]

  142
Ha pan guelas an steren bras Jaspar
Ha Melchyon da Doue Roue’n Tron, hon car,
Ha Balthasar, try roe, try car parfet,
A dygacas gant joa bras hac a scler
Aour, myr, esancc, cheuancc hac offrancc quer,
Don guir Crouer en esper a cher net.
          Vn dro, guen hon bet !
          An Map man ganet
          Net hon remedo
          A tempest estlam
          Dre hon tat Adam
          Hac Eva, hon mam ;
          A blam hon lammo.