AN HEVELEP TUD, IVONIG, BERC’HED

IVONIG
Met, sellit ’ta pebezh penn kalet he deus hi !

NIKOLAZIG
Petra zo ?

IVONIG
                   Feiz ! Chikan, rak ne fell ket dezhi
’Ve lavaret, ’dalek hiziv, Berc’hed dezhi
Ken.

NIKOLAZIG
         Perak ?

IVONIG
                       Ho ! Soñjoù !

NIKOLAZIG
                                                 Pe anv ’roimp-ni
Dit eta ?

IVONIG
                 Annaig.

NIKOLAZIG
                               Annaig ?

IVONIG
                                                Bravoc’h eo
’Get Berc’hed.

NIKOLAZIG
                          Annaig ? Met hennezh eo anv
Va Mestrez vat !

GOULC’HEN
                              Na pebezh soñj !

IVONIG
                                                              Kaer am eus bet
Lavaret dezhi kant gwech eo anvet Berc’hed
Ha nann Anna, emañ atav gant he huñvre
Ha mar ne blegan ket e vo trouz adarre.

NIKOLAZIG
Te ’gar Santez Anna ?

Berc’hed a lavar ya gant he fenn.

                                         Kement ha piv ’ta, klev ?

BERC’HED
Kement ha ma karen va mamm ha pa oa bev.

NIKOLAZIG
Ha perak e karez Santez Anna kement ?

BERC’HED
Rak hi hepken a zo mamm-gozh e-mesk ar sent.
Div vamm-gozh hon eus ket ’ta, Ivonig ? Unan
War an douar, Jabel ; eben all zo bremañ
En neñv : Santez Anna.

NIKOLAZIG
                                           Pa’z eo gwir e karez
Kement va Mestrez vat, kontant eo p’he fedez.
Sav eta da zaouarn, war-zu enni. Pedomp
Hon-daou, hag hor-pevar, ’vit ar re a garomp.

BERC’HED, he daouarn kroaziet ganti etre daouar, NIKOLAZIG, a lavar war e lerc’h ar bedenn-mañ :

    Santez Anna, mamm-gozh Jezuz,
    Ouzh ar pec’her bezit truezus.
    Ma n’emaoc’h ket a-du ganeomp
    ’Vit hon difenn, kalz re zinerzh ’omp.
    Setu perak, mamm-gozh Jezuz,
    Ouzh ar pec’her bezit truezus.

NIKOLAZIG
Mat, Berc’hed.

BERC’HED
                           Pas Berc’hed, Annaig.

IVONIG
                                                                   Sellit ’ta
Na pebezh penn he deus hounnezh ’velkent !

NIKOLAZIG
                                                                                  Petra
’Ri dezhi ? Peogwir he deus div vamm-gozh he ’c’hell
Ivez ’michañs, kaout div batronez.

GOULC’HEN
                                                               Netra gwell.

NIKOLAZIG
Kontant ’out ?

BERC’HED
                          Kontant ’on.

IVONIG
                                                Deomp ’ta bremañ d’ar red.

NIKOLAZIG
Da b’lec’h ?

IVONIG
                      D’ar Bosennoù.

NIKOLAZIG, a-gostez
                                                   O Va Doue, n’eo ket
Mat evelkent… O zad…

GOULC’HEN
                                           Deu’t kentoc’h ganin-me
Me am eus ezhomm ac’hanoc’h ; deut ’ta, bugale.

Mont a reont kuit.