Perinaig (4)

Rumm
Barzhoniezh
Yezh
Brezhoneg
Orin
Paris, J. Maisonneuve, 1898
Evezhiadenn
Reizhet hon eus an doare-skrivañ, ha dalc’het hon eus gant troiennoù orin (ar c’hemmadurioù, ar rannigoù, h.a.).
Treuzskrivañ
Sébastien Marineau
En hevelep levr :

              IV 

          Ar gourgammoù-tan a strinke, 
          Ur vouezh en nec’h c’hoazh pa gane, 

          ’Kreiz ar bern suilh stennet uhel 
          A gane gwerzig Breizh-Izel. 

          Emberr Perinig pa vougas, 
          He mignonez a daoulinas, 
          Ha paouezet mik da ganañ 
          A stagas a-grenn da ouelañ. 

          Kerkent ur burzhud zo gwelet, 
          Ken ar Saozon oe souezhet : 

          Rak zo staget un avel tomm 
          Da c’hwezhañ war o fennoù plom. 

          Ha savet an holl gant spouron 
          O welet ruz-tan ar Saozon, 

          Ruz o zremmoù hag o zilhad, 
          Hag ar barnerien ruz ’vel gwad, 

          Ruz prezeger hag arc’herien, 
          Ha ruz tro-war-dro an dachenn, 

          Hag an iliz gant ar c’hleier : 
          – An tan, em’e, zo war ar gêr ! – 

          Ha gant ur c’hef an diaouloù 
          ’Lakae tan e bolz an neñvoù. 

          Ha pep hini ’krede zoken 
          A deve betek e vou’ellenn ; 

          Ken ar veleien ’hirvoude : 
          – Hounnezh oa paourez da Doue ! – 

          Neuze zo gwelet un evnig, 
          ’Michañs ene Perinaig, 

          O tarnijal eus an tantad 
          Ouzh ar vignonez da gimiad. 

          En-dro d’ar plac’hig un ervenn, 
          Ruz-glaou ’re-all, un ervenn gwenn. 

          Ha dre ma save d’an oabl splann 
          Diwar e nij an evnig glan, 

          ’Torre d’an tan diwar e lerc’h, 
          Hent ar stered gwenn ’vel an erc’h ; 

          Ha kuñv war gât ar baradoz 
          ’Kane ’vel eostig Koad-an-Noz… 

          Setu c’hoazh un dle zo laosket 
          Gant ar Saozon d’ar Vretoned ! 

          Karo Saozon nep a garo, 
          Biken Breizhad n’o fardono !