Vers 203 à 238

Rumm
Barzhoniezh
Yezh
Krennvrezhoneg
Orin
Paris, H. Champion (embannet gant Émile Ernault), 1914
Evezhiadenn
Dalc’het hon eus gant an doare-skrivañ orin.
Treuzskrivañ
Aleksandr Ar Gall
En hevelep levr :

Sell diff ho relegou, ho bezyou hep paoues,
Hac oll pan ez ve Franç, bet ne diferances:
Ho bezaff Duc na Roe, nep ploe ne auoehes,
Muyguet seruicheryen, pe peuryen diouz Renes.

Ne aznafes nep guis, bourchis diouz plouisyen,
Na den á nep heny, diouz na fry na diouguen:
Ne aznafes cares, certes diouch an estren,
Ne aznafes enep, an eil gruec diouz he-ben.

Dan propos hep quet chom, é comps Chrisostomus
A goulen mazedy, an re luxurius:
A finuezas vn dez, ho buhez truezus,
En delectation, hac en faeçon confus.

Sell yuez ho bezyou, ha ne quyffy gaou quet,
Syn á pinuiziguez, na’n buhez so bezet:
Syn flam á guisquamant, ne guel bout seblantet,
Na huerzin, na hoary, na deduy á priet.

Gouuez lem an reman, ne quyffy glan manet,
Nemert breynder adreff, ha ramaignant preuet:
En douar bet nary, ez yndy reduiet,
Deze ne taluoe stat, bezaff re goac maguet.

Sanct Bernard á deury, en é pridiriou,
A goulen maz eo aet, nep á care’n bedaou:
Nen deux quet cals amser, abanoant en keryou,
Ha breman ez ynt aet da boet dan preuedou.

Diligant entent frez, pebez ez ynt bezet, 
Eueldot da bout tut, ez viont reputet:
Breman ez ynt ludu, á pep tu conduet:
Chede’n fin pe heny, ez duy hep fazy quet.

Dibryff creff hac euaff, gaudissaff hep caffou,
A coup en ho bombanç, ho deueze dançou:
En yoa bras hep lastez, bet finuez ho dezyou:
Breman nendeux espernn do quernn en yffernou.

Ho quic so milliguet, da boet dan preuedou,
Han eneff so en tan, ouz gouzaff an poanyaou:
Deze ne tal netra, nemet goa an yoaou:
Ho deffoe en bet man, noman ha saouzanou.