Vers 95 à 130

Rumm
Barzhoniezh
Yezh
Krennvrezhoneg
Orin
Paris, H. Champion (embannet gant Émile Ernault), 1914
Evezhiadenn
Dalc’het hon eus gant an doare-skrivañ orin.
Treuzskrivañ
Aleksandr Ar Gall
En hevelep levr :

Vn faeçon gant é dart, é laz nobl ha partabl,
Nen deux den nep heny, na squoï quen dihabl:
Heman é pep amser, so quen Intollerabl,
Nen deux queguyn na sal, ouz é scandal valabl.

Ne les da chom comun, na bugale munut,
Gantaff ez a an bras, quen buhan han astut:
Ne doug na Duc na Roe, na nep en deuoe brut,
Na Pap, na Cardinal, muyguet aneual mut.

Den coz, na den Iaouanc, ne dianc é langour,
Ne negun a nep stat Prelat, na Marchadour:
Ne tal tour, na Castel, er quen fell en bellour,
Ne tal reuz den euzic, na son gic a sicour.

Ne reffus Impalazr, tut cazr muyguet lazron,
Nen deux Saux quen ruset, na voar an bet Breton:
Na enclasq ha gascoignn, Coloignn ha Borgignnon,
Voar vn dro é ret franç, Cleranç hac Alançon.

Couls an creff hac an fall, so en dan é gallout,
Ne achap merch na mam, vn lam diouç é hambout
Oll ez disquer oar huen, pobl humen hep quen dout
Dre’n bet ez ret seder, mat é santer é rout

Squeyff ara perchen aoür, couls hac an re paouraf
Negun ne lesse lig, euit é seruichaff:
Coulx cloar ha tut lic, heruez maz replicquaff,
Pemdez dre’n deuez hoant, á ren presant gantaff.

Ac eff na comps dymp-ny, hep na ysayas,
Pehiny so bezet, prophet á galloet bras:
En vn goulen hep mar, maz eo aet an cloar bras?
Bezcoaz ne voe Iurist, dan trist á resistas.

Euyt oarse scianç, nen deux den auançet,
Nac eo ret hueru meruel, pan vezo peur sellet:
Quen tyz eza’n doctor, na vez mar enoret
Euell maz a’n disquibl: an deu vibl horibldet?

Lauar oarse presant, m’edy alexaudre,
Nabuchodonosor, Achor, Hector de Troye?
Na Iulius Cesar, diff lauar an doare:
Moyses, nac Aaron, na Salomon an roe.