Prologue (vers 1 à 58)

Genre
Poetry
Language
Middle Breton
Source
Paris, H. Champion (édition par Emile Ernault), 1914
Notice
The original spelling has been kept.
Transcription
Aleksandr Ar Gall
In the same work :

En hano an Tat, han Map apret
Roe ha croer, han Glan Speret
Vn Doe auoeét drez credaff,
Pere en personou cogant
So try fier ha diferant:
Ha se presant a assantaff.

Dezraou vn libel an guellhaff
Dan popl lyc do em applicaff,
Ha preparaff quent muy cafaou
Penaux pan renther an speret
Ez dle bout hep bech a pechet:
Pa bout daffnet dre é fetou.

Mezellour an Maru an garfaff
So entre an pobl a credaff,
An Lefr man a vezo hanuet:
Ardant, Luysant, euyt gantaff,
Nos, dez, en em consideraff:
Ha humiliaf Tut an bet.

Leshanuet vezo hep nep gaou
Geneompny yuez en dezraou,
Heruez é doctrinaou laouen:
Dirac pep vnan cordial, 
Rac é doctrin ouz pep scandal:
Ha drouc, a mir Calon pep den.

Rayson aral a lacquaff afet
De bout cordial leshanuet,
Honnez eo rac en hon metou:
Ez dle bout certes dre raison,
Me queff é effet plantet doun:
A faeçon en hon calounou.

Diuision du liure

An Lefr man damany da pep heny rial,
A comps a pevar fin, anterin terminal:
Pere da pobl an bet, so ordrenet detal:
Gant Doe roe’n bet seder, ha croéer general.

En quentaff poent hep sy, ez quiffy special,
Comps seder anterin, an fin original:
So hanuet tyr ha mor a gor maru corporal,
An fyn man den ne les, en Pales na en Sal.

En eil poent ez yoenter, hac ez compser certen,
A vn fin infinyt, credit na doutit quen:
Penaux diouz plom ha scuezr, ez barnher pechezrien
Dren fin man credet lem, hoz drem a renc tremen

En Trede ez guelher, hac ez leher yuez,
An poanyou Infernal, en sal a angalez,
An fin pe da heny, ez ay en diuez:
Nep en pechet chetu, a conclu ho buhez.

Hac en peoare fyn, huy guelo terminaff,
An ty celestiel, so padel vhelaff:
Certen pe da heny, ez dleomp ny spiaff,
Goude fet an bet man, monet glan dianaff.

An re man peb amser, so fier peder rot:
Certen da pep heny, endan é chariot:
Ha mar ho preder glan, ez ay buhan dan trot:
Dan gloar bed’ en nary, gante y hep riot.

Pan deu hon azrouant, cogant don tourmantaff,
An Quic, han drouc Speret, hac an Bet a credaff
Confat an peder rot, a dleomp dan trot scaf:
Han maru a IESV-Christ, maz ray dimp resistaff.