daskor - facebook  daskor - css

Daskor

Breizh-Izel

Genre
Poésie
Langue
Breton
Source
Morlaix, J. Haslé – Paris, L. Hachette – Nantes, V. Forest et E. Grimaud, 1865
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

– Lâr din, anaout a rez ar vro
’Lec’h, war ar garreg, ’sav derv ;
’Lec’h ’kan ar barzh war dreuz e zor,
Ha war an aod e trouz ar mor ?

– Ya, ar vro-se eo Breizh-Izel ;
War ar bed pa daolan ur sell,
E nep lec’h na welan hini
A c’houlenn ken bras meuleudi.

– Lâr din, anaout a rez ar vro
’Lec’h ma kaver c’hoazh war un dro
Komz Doue hag ar feiz o ren,
Ha reizh hag eeun kalon an den ?

– Ya, ar vro-se eo Breizh-Izel.
Me a garfe ’vel ar sparfell
Kaout divaskell, evit monet
’Trezek ar vamm ’deus ma ganet.

– Lâr din, anaout a rez ar vro
’Lec’h na gren den rak ar marv ;
Ma vever e doujañs Doue,
Ha doujañs lezenn ar roue ?

– Ya, ar vro-se eo Breizh-Izel ;
Evidon bezañ diouti pell,
D’al lec’h m’eo chomet ma c’halon
Ma spered ’nij ’vel ur gudon.

– Lâr din, anaout a rez ar vro
’Lec’h, evel bleuñv ’barzh ar parkoù,
Ma weler ar merc’hed yaouank
Er pardonioù, seder ha koant ?

– Ya, ar vro-se eo Breizh-Izel.
Kudon a nij a denn-askell
War-zu ma bro, lavar, koulmig,
Demat da Vona, ma dousig.

– Lâr din, anaout a rez ar vro
A gar he gizioù kozh atô,
Ma peder c’hoazh en ilizoù,
Hag er vered, war ar bezioù ?

– Ya, ar vro-se eo Breizh-Izel.
Koabrenn, kaset gant an avel,
Un tamm d’an douar diskennet,
Ha betek ma bro ma dougit.    [ma douget] 

– Lâr din, anaout a rez ar vro
Ma kaner gwerzioù ha sonioù,
E-tal ar fornigell, bep noz,
E koun oberioù ar re gozh ?

– Ya, ar vro-se eo Breizh-Izel,
’Lec’h ma fell din mont da vervel,
Ha bezañ un deiz douaret,
Gant ma broiz en o bered.

****

– An hini a savas ar son
Zo ur soudard, trist e galon,
Hag a varvo gant koun d’e vro,
Met prest da Vreizh e ve distro.