XIII Diviz

Genre
Théâtre
Langue
Breton
Source
Saint Brieuc, Moulerezh Sant Gwilherm, 1909
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

AN AO. GARGAM, YANNIG e niz

YANNIG e groaz gantañ, a lamm da c’houzoug e eontr
        O va eontr, m’ho kar !
M’ho kar dreist-holl draoù an douar !
Ur bloavezh mat ha kalz re all
Deoc’h, a hetan hep hini fall !…

GARGAM
Te, da vihanañ, va faotrig,
A ziskouez kaout ur galonig.
O sell ’ta ! ar groaz zo ganez !
Evit doare e labourez ?

YANNIG
O ya, va zonton Gargamig,
Mont a ran brav war va fouezig.
Da c’houlenn ouzhoc’h kalanad
’On deuet hiriv, c’hwi ’oar ervat.

GARGAM
Hag e kav dit e c’hellan-me
Reiñ arc’hant d’an holl evel-se ?

YANNIG
O ya, va eontr, a-grenn eo ret,
Rak ur werenn am eus torret
War di nevez ur c’hrignousez
Am lardas druz gant he botez !

GARGAM
Gwir ?

YANNIG
Ouzhpenn, lazhet ’meus ur yar
Gant un taolig maen en he gar.
Roet ’meus va ger d’o faeañ
A-raok kuzh-heol en devezh-mañ,
Gant na vo lavaret netra
Da’m zad, da’m mamm – a oar netra ! –
N’hellot ket alese fiñval
Ken n’am  bo ket va ugent real !

GARGAM
Selaou ’ta ac’hanon, Yannig,
Pa labourez, va mignonig,
Ez pezo da bezh ugent real !
Hogen, na lâr man d’ar re all.
Del !…

YANNIG, o tilammat da vont er-maez
           Tapet em eus anezho !…
Da’m zonton mat kenavezo !…