Hirvoudoù ha pedenn

Genre
Poésie
Langue
Breton
Source
Saint Brieuc, René Prud’homme, 1905
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

    da’r barzh Taldir

Va c’halonig ennon a zo holl ankeniet,
Pa welan Breizh-Izel, va bro muiañ-karet.
Gwall gaset gant tud fall enebourien pep mat...
    O Doue, pebezh kalonad !

Hag e klaskont tagañ gant kalz hardizhiegezh,
Pezh zo gwellañ e Breizh : He c’hizioù hag he yezh,
Evit mougañ aesoc’h feiz kreñv an Arvoriad...
    O Doue, pebezh kalonad !

O gwelet a reer stank dre hentoù Breizh-Izel,
O c’hoapaat ar Vreizhiz, o c’hredennoù santel,
O teuler dismegañs war gement a zo mat...
    O Doue, pebezh kalonad !

Gwazed kreñv maezioù Breizh, leun-bar ho kwazied
Eus gwad yac’h hon tadoù, ar Vreizhiz ken brudet,
Pegeit c’hoazh e chomo serret ho taoulagad !
    O Doue, pebezh kalonad !

***

Arzhur, Marzhin, Lez-Breizh, savit eus ho pezhioù !
Embannit ar brezel1, Bretoned a-strolloù
A zeredo gant pres, a stourmo evit mat !
    O Doue, klevit va mennad !

Kement a c’hoantaomp : frankiz ha lealded
A lamer tamm-ha-tamm digant ar Vretoned ;
Enebomp, kenvroiz, unanet er stourmad.
    O Doue, klevit va mennad !

O va Salver Jezuz, Doue ar Vretoned,
Pegeit ouzhomp eta ’vefoc’h-hu kounnaret ?
Roit ar peoc’h, ni ho ped, c’hwi hag a zo ken mat !
    O Doue, klevit va mennad !

Itron Santez Anna, mamm gozh ar Vretoned,
Dalc’hit en hon touez ar ouenn eus ar Varzhed ;
Grit m’o gwelimp bemdez muioc’h-mui o stankaat.
    O Doue, klevit va mennad !

____

1 Brezel e pehini na dleer kaout evit armoù nemet ar gomz hag ar bluenn.