Poan ’rafes d’hoc’h aelig !

Genre
Poésie
Langue
Breton
Source
Saint Brieuc, René Prud’homme, 1905
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

    d’an Ao. Gouzien, kure e Landi

Bugelig koant ha mibin,
A gavan o c’hoarzhin,
Ma tegouezh ganez gwelet
Ur c’hwilig alaouret
O c’hournijal er pradoù,
O klask ar bokedoù,
Na dorr ket he askellig,
Poan ’rafes d’hoc’h aelig !

War gerreg flour an aodoù,
O tiskouez a-wechoù,
Ma tegouezh ganez gwelet
Ar c’hlazard perlezet,
O tommañ en heol skedus
E gorfig lugernus,
Na vruzun ket al loenig,
Poan ’rafes d’hoc’h aelig !

Pa deu an nevez-amzer
Gant e zeizioù seder,
Ma tegouezh ganez gwelet
Pe vioù, pe laboused,
Kuzhet en ur c’harzh lannek,
Pe en ur valaneg,
Na zistruj ket an neizhig
Poan ’rafes d’hoc’h aelig !

Er parkoù, ouzh ar c’hleuzioù,
El lec’h ma’z eus bleunioù,
Ma tegouezh ganez gwelet
Ur wenanenn pladet,
Ur wenanennig dic’hloar
O klask mel dous ha koar,
N’he lazh ket, va mignonig,
Poan ’rafes d’hoc’h aelig !

E-pad tommder an hañvoù,
O redek er maezioù,
Ma tegouezh ganez gwelet
Ur c’hrilh-kaner heoliet,
O kanañ mil meuleudi
D’e Grouer gant dudi,
N’he spont ket, va bugelig,
Poan ’rafes d’hoc’h aelig !

Ma pefe c’hoant un devezh
Gant gwall gompagnunezh,
Da ober un dra c’hrevus,
Traoù fall, c’hoarioù euzhus,
Tec’h prim, tec’h kuit hep dale,
Truez ouzh da ene !
N’he lazh ket, va bugelig,
Poan ’rafes d’hoc’h aelig !

Kurunet er bloaz 1904 gant an Association littéraire et artistique de Bretagne