Er Baradoz

Genre
Poésie
Langue
Breton
Source
Saint Brieuc, René Prud’homme, 1905
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

     da’m breur Louis, mordead
     war don Les sabots de la duchesse Anne

En noz all edon en eorez,
    Kousket, ur sulvezh,
Gant kenvreudeur merdeidi,
    Gwaskedet hon tri ;
Hag e ris un huñvre souezhus,
    Dont a rae eus Aelez Jezuz
        A ! A ! A !
Selaouit an huñvre-mañ !

Tost da Ber ’oan o c’hortoz
    ’Barzh er Baradoz,
Pa lavaras Doue dezhañ :
    « Porzhier al lec’h-mañ,
Diwall ouzh paotred Penn-ar-Bed,
    Setu un toullad o tonet,
        Tud a vor
A deu da c’houlenn digor !

Ra c’helli, Per, hep marc’hata
    Eurvad o rannañ !
An nor aour digor ar brasañ,
    E-lec’h he serrañ,
D’ar re ’eve re vanneoù
    Kalz an’e zo war an hentoù !
        O ! O ! O !
Ni ’welo petra ’zegouezho ! »

– Deuit afo, ’me ’r porzhier kozh,
    Deuit er Baradoz !
Deuit holl, paotred ar gwin-ardant,
    Evel m’am eus c’hoant !
Ar re all ’chomo da sellet
    ’Kichen an nor vras alaouret,
        He ! He ! He !
Hep koll kalon evit-se !

- Mat e ya ! ’lârjont da Ber
    Al liperien gwer...
Setu fin poanioù ar bed,
    Mui ’met eürusted !
Deomp a-raok ’ta holl, mignoned,
    Deomp, ar « rad » a rankomp gwelet !
         A ! A ! A !
Hastomp mont da ebata !

Hogen, dizale ’sav kroz
    Barzh er Baradoz ;
Klevet a raen trouz ha safar,
    Gwir ez oa glac’har.
Hegasiñ ’raent ar c’haezh Sant Per,
    ’Defot na zegase de’o gwer,
        O youc’hal :
« Gwin-ardant evel gwechall ! »

Hag e lârent d’an den-Doue :
    "Penaos an dra-se ?
N’eus ket zoken er Baradoz,
    ’Giz en hor bro gozh
Un tammig ostiz, ’vit arc’hant,
    Da reiñ ur banne gwir-ardant !...
        A ! A ! A !
Ni a ya da zouarañ !...

Glac’haret holl gant an istor :
    – It d’ar Purgator !
A lâras dezho Sant Per,
    Goulskoude tener,
C’hwec’h mil bloaz eno o tommañ,
    Diouzh gwin-ardant reiñ divoazañ,
        Rak amañ
E reer fae war an evañ !...

Setu ar wazed poellus
    War-dro ’r sant eürus,
Pokat da draoñ e soutanenn.
    Holl dre o fedenn
E c’halvent madelezh Sant Per,
    Da reiñ pardon d’o breudeur ker,
        Kondaonet
’Vit bezañ ken fall komzet !

« Disoñjal ’ran o flemm garv,
    ’Lâras Doue d’e dro,
Deuit eta, c’hwi, em eürusted,
    Deuit holl, Bretoned,
Eürus an dud a galon vat
    O ya... Ren a raint gant o zad ;
        Me ’fell din,
An neñv ganto a rannin... »

Goude, Per, ar sant ken mat,
    Lâr gant kalonad :
« Pedit, pedit, mignoned,
    ’Vit ho tud dallet,
Ma labourint da zivoazañ
    Diouzh an evaj ’deu d’o lazhañ :
        Korf, ene ;
Va selaouit ’n an’ Doue ! »

War an dra-mañ p’on dihunet,
    Tost din ’meus kavet
Dour a-varroù, ur voutailhad ;
    A ! va c’hredit mat !
Goude an huñvre, ar marvailh
    M’em eus kroget prim em boutailh,
        Nom de nom !
He stlapet ’meus er mor don...

    graet e galleg gant Taillevent