Tristidigezh ha ged vat

Genre
Poésie
Langue
Breton
Source
Saint Brieuc, René Prud’homme, 1905
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

    d’an Ao. de l’Estourbeillon, kannad ar Morbihan, rener Kevredigezh Broadus Vreizh, kinniget gant doujañs

Eus a bep korn a Vreizh-Izel
E sav, douget gant an avel
Keleier doanius, forzh klemmoù,
A wask siwazh ! hor c’halonoù.

Ur brezel kalet ha diaoulek
Zo graet d’hor yezh, ar brezhoneg ;
Mall eo ganto hen diframmañ
Digant bugale ar vro-mañ.

An diaoul e-unan, a dra sur,
A c’hwezh an tan en dud distur,
O c’has dre bevar c’horn ar vro
Da ledañ anken ar marv.

Kement tra vat : Bro, Feiz ha Yezh,
A zo breset mard eo truez !
Karantez ebet mui enno,
Leun ’int a gasoni c’hwerv.

O va Doue, pelec’h emaoc’h ?
Diskouezit ho kalloud pelloc’h...
Re hir amzer an dud fallakr
A wall gasas hor madoù sakr.

Doue na zilez ket hor bro,
Beuzet, siwazh ! en he daeroù,
Dibabet ’neus tud kalonek
Da zifenn mat ar brezhoneg.

Mil bennozh deoc’h, o va Aotroù,
Evit hoc’h holl vadelezhoù
E-keñver hor bro Breizh-Izel
A zo bet deoc’h atav fidel.

Setu un nebeud bloavezhioù
Ma vez graet kenskrivadegoù
Evit dougen ar varzhed taer
Da labourat hor yezh ken kaer !

Paotred yaouank eus ar gwellañ,
Dre gant a ranker o c’hontañ
A gas bep bloaz, e brezhoneg
Gwerzioù koant d’ar genskrivadeg.

Hor c’halonoù a laouenañ
Pa welomp an dud gouiziekañ
O poaniañ start evit hor Breizh,
Dre ma washa d’ar brezel kriz.

Ar brezhoneg zo enoret,
Ha dre-holl muioc’h-mui komzet ;
Hon tadoù kozh, en o bezioù,
A drid bremañ o c’halonoù.

Ra vevo galloudus ha pell
Kevredigezh hor Breizh-Izel !
Pell anavezet ra vezo,
Eus ur penn d’ar penn all d’ar vro...

Nann, nann, va c’henvroiz karet,
Hor yezh na vo ket diskaret,
Na varvo ket ar brezhoneg
Tra vo e Breizh tud kalonek !...