I Pennad

Genre
Théâtre
Langue
Breton
Source
Brest, Moulerezh ru ar C’hastell, 1926
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

HOLLVELEN, GARWENN azezet o div war skiñvier

GARWENN
Daoust hag un dra bennak ganit a c’hoari fall ?
Ne gavan ken ’c’hanout seder evel gwechall.

HOLLVELEN
Eürus ’on koulskoude gant Nerzhveur ; rak biskoazh
Ab’oe ’maomp euredet, daou viz a vo warc’hoazh,
N’em eus klevet na kroz, na klemm, na dislavar,
Met hon gwenvidigezh ’meus aon ’vefe war var.

GARWENN
Kaout a ra dit ’c’hallfe Nerzhveur dont da zroukaat ?

HOLLVELEN
Ne deuio ket : rak e galon a zo re vat,
Ha va c’harout a ra kement hag e garan.
Met pa grenan, Garwenn, evitañ ’n hini ’ran,
N’eo ket evidon-me.

GARWENN
                                     Ha diwar-benn petra ?
Ur stumm yec’hed a zo warnañ deus ar c’haerañ,
Nemet e benn, goude koll kement all a wad,
A deufe marteze dre skuizhder da klañvaat.

HOLLVELEN
Nerzhveur a zo ken yac’h hag an ivinenn vras
A led ’us d’an ti-mañ disheol he skourroù glas.
Hogen en-dro dezhañ en em astenn un dorn,
’Kreiz an deñvalijenn kuzhet e korn pe gorn,
Hag a glask e dizhout gant saezhioù kontammet,
Pe gant mein ne oar den a belec’h ’int talmet.
Burzhudus eo n’ez eus ’n em gavet evit c’hoazh
Gant ar c’haour dizifenn na poan, na taol[,] na gloaz.
Met, o vezañ gwelet ne deue maen na saezh
D’e gaout nemet e-un’ ’vije lezet e-maez,
Me ’chom atav bremañ d’e ziwall pa ve tost ;
Ha pa’z a diouzh ar gêr ’ve renet gant Kreñvbost,
Aet hiriv c’hoazh gantañ da bred-meur ar roue.

GARWENN
Goût a ouie Nerzhveur ’oa klask war e vuhez ?

HOLLVELEN
D’an taol kentañ ’lâras : « Un tenner fall bennak ! »
D’an eil : « Sell un tenn bir heñvel ouzh re Garnak ? »
Ouzh an taolioù war-lerc’h n’eus bet graet van ebet
’Met goulenn a-berzh piv e c’hallfe bezañ bet
Dastumet gwarizi, droukrañs pe gasoni ;
Ha kaer en dije klask, ne gouezhe war hini.

GARWENN
Nann, biskoazh nag e dud, na Nerzhveur e-unan
Na rojont digarez da zroukrañs da ziwan,
Na da gasoni ’bet da c’hervel muntrerezh.
Biskoazh n’o deus graet poan na divaloerezh
Da zen.

HOLLVELEN
                 Sell ! petra zo ? – Nerzhveur o tont d’ar gêr
E-kreiz ar banvez-meur, eñ hag e ambrouger !