Judica me
                    (Ps. 42)

O douster an oferennoù en ur chapel,
Ur chapelig didrouz e maezioù Breizh-Izel !…

***

Barnit me, o ma Doue, ha me dispartiit³²
A-vesk an dud disleal hag ar renavied.

Rak, o ma Doue, C’hwi a zo ma c’honfort ha ma nerzh.
Dilezet ganeoc’h-c’hwi, en dristezh me a gerzh.

Perak ma dilezel em dristezh divalav
P’en deo an enebour war-dro din o klask dav³³ ?

Degasit din Ho kouloù hag Ho kwirionez,
Gante me a grapo, diluz, war Ho menez ;

War Ho menez santel, bet’ Ho ti leun a joa³⁴.
Ambrouget d’Ho kouloù, me a grapo, ma Doue.

Hag e tostain d’aoter ar road³⁵, en iliz,
D’aoter an Doue hag a ra joa ma yaouankiz.

War ma zelenn, ma Doue, Ho meuliñ a fell din :
Perak, m’ene, bout trist ha perak hirvoudiñ ?…

Fi e Doue ! Rak me Her meulo bet’ an diwezh³⁶,
Eñ a zo ma Salver hag Eñ a zo ma Doue.

***

O douster an oferennoù en ur chapel,
Ur chapelig didrouz e maezioù Breizh-Izel !

Bout, dre ur galon glan, ur c’houlaouenn dister
A luc’h bepred dirak an Osti, o douster !…

Bout ar beleg gredus war-sav diouzh an aoter
A ginnig an aberzh, o douster !… o douster !…

                    C’hwevrer 1910

32 W dispartiet

33 point vulnérable e galleg

34 W joé

35 aberzh pe sakrifis

36 W devé