Kentañ diviz

Genre
Théâtre
Langue
Breton
Source
Rennes, Francis Simon, 1907
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

Ul lanneg vras gant ur maen-hir en he c’hreiz. – Noz du-dall eo. – Klevet a reer ar binioù hag ar vombard o c’hoari evel pa vefent pell-kenañ. – An traoù a dremen da Veurzh al Lard diouzh an noz.

KENTAÑ DIVIZ

MAZE, goude bezañ graet div pe deir gwech an dro d’ar maen-hir en un horjellat.
Pe du ez in bremañ ?… A-zehoù ? A-gleiz ?… A-dreñv ? A-raok ? Div eur zo ma kerzhan el lanneg vras, satordallik… Div eur zo !… Hep kaout hent ebet da vont er-maez. Ha ! Va den, n’out ket gwall sonn ken war da zivesker ’meus aon. Al lagout a lonker a sav d’ar penn, ar chistr a ever a gouezh d’an treid. – Ur sac’had mat a chistr a gasan hiziv d’ar gêr, fidamdoustik !

Ba ! An Aotroù Doue en deus roet deomp avaloù er bloaz tremenet ken na dorre ar skourroù dindan o sammoù : pec’hed eo ober fae war an traoù mat a ro deomp hag, evidon-me da vihanañ, ne laoskin ket va lod da vont gant un all.

N’eus forzh, me ’garfe gouzout koulskoude e pe gorn eus al lanneg emaon bremañ. – Youc’hal a ra. Hola ! Hola !

N’eus den ebet war-dro aze ? Ma n’oc’h na bouzar, na mut, e c’hellit respont ac’hanon emichañs ! – Goude un ehan. Netra !… Noz du-dall ! Sorset ’on bet, mil gutes ! Sorset mat, hag e doare e vezo ret din kousket er-maez en noz-mañ.

Ha va faourkaezh Mari-Yann a zo du-hont o roc’hal hec’h-unan-penn ouzh va gortoz ! Va Doue, prenet am eus dezhi un « turlututu » hag unan brav evit na vezin ket re c’hourdrouzet ganti p’en em gavin er gêr, hag un tammig fars gwinizh e gasan ivez dezhi da c’hellout kaout an tañva eus ar meurlarjez mat a zo bet hiziv e ti va zonton kozh.

Che ! Me ’glev un tamm trouz… Youc’hal a ra. Petra ?

UR VOUEZH, o tont a bell
Netra.

MAZE, a bouez e benn
Petra ?

AR VOUEZH
Netra.

MAZE
Netra ! Netra ! Met komzit ’ta ! Mard oc’h un den komzit brezhoneg, mard oc’h un diaoul komzit galleg, met lavarit din e pelec’h emañ an hent a ya eus al lanneg-mañ d’ar Genkiz. Me ’baeo deoc’h ur chopinad eus va hini gwellañ er wech kentañ ma tremenoc’h hebiou da’m zi. – Komzit ’ta ; daoust din da vezañ mezv ne c’houlennan ket chom da dremen an noz e kambr ar stered. Ha mard oc’h kollet hoc’h-unan, me ’ziskouezo deoc’h hoc’h hent ivez. Deuit ’ta ! Deuit ’ta !

Kouezhañ a ra war e grabanoù.

Deuit en anv Doue da ziskouez e hent d’ur paourkaezh mezvier dianket ! Me ’glev ac’hanoc’h mat a-walc’h o fistoulat a-dre kein ar c’harzh. Mil gutes ! Piv zo aze ?