Trede pennad

Genre
Théâtre
Langue
Breton
Source
Scrignac, Feiz ha Breizh, août 1939
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

YANNIG, AR VESTREZ, MERIADEG

YANNIG e-unan
Setu-me, va-unan, mab ar sec’h ! Ret eo koulskoude, a-raok ma vo noz, echuiñ al lavreg-mañ. Deomp dezhañ, satordallik, ha ma ne deu den da’m distreiñ diouzh va labour, e vo peurc’hraet a-raok un eur amañ… Ha lavaret c’hoazh eo ar bouc’h a gonsort-se eus a Langonbrag eo a zo kaoz m’emaon-me evel-se o kreviñ va daoulagad, noz-deiz, evit ur friko… Hum ! Ha piv ’oar zoken ha dont a c’hello a-benn d’hen ober ; met teñvalaet eo an amzer a gav din. N’on ket gouest ken da lakaat an neud e kraouenn an nadoz… Ne c’hellin ket echuiñ… Ne c’hellin ket, sur a-walc’h.

(en un huchal) Gouloù, mar plij ganeoc’h ! Gouloù ! Ken teñval hag ur fourn eo ho ti, mab ar sec’h. Degasit gouloù din, pe anez ne echuin ket ho labour.

AR VESTREZ a-ziabell
Kerzhit da gas ur c’houlaouenn dezhañ, Meriadeg, ’vit ma stanko e genoù. Ret e vo dizale kaout da nebeutañ seizh mevel evit servijañ ar c’hozh kemener brein-se war e dorchenn !

YANNIG da Veriadeg oc’h en em gaout gant e gantolor.
Degas da c’houloù, va mab ; degas buan, paotr. Ne welan mui netra, mab ar sec’h, netra ’n holl. Teñvalaat buan en deus graet an amzer.

MERIADEG
Koshaat a rit ivez, tonton Yannig.

YANNIG
Ha te ! Stronk, war yaouankaat eo ez ez, moarvat ! Ar seurt-mañ a zo bugale, evelkent ! Kae ’ta da sellet kentoc’h pet eur eo !

MERIADEG
Seizh eur eo, tonton Yannig.

YANNIG
Seizh eur ! An noz a zo kouezhet eta ! Biskoazh kement all ! N’on tamm ebet souezhet ma’z eo ken teñval ar maez ! Seizh eur dija ! N’em bo ket biken a amzer a-walc’h da echuiñ al lavreg-mañ ! Mil gurun ! Kae da vale, bremañ, labousig, kae ! Kae da welet ha me a zo en ti-chistr.

MERIADEG
Glav bras a ra, tonton Yannig.

YANNIG
Glav bras ? Ne glevan ket netra koulskoude ! Netra ’n holl.

MERIADEG
Glav bras ha luc’hed, tonton Yannig.

YANNIG
Luc’hed ivez ! Kurun a vo neuze ’ta ?

MERIADEG
Feiz ya ! Tonton Yannig, setu eñ o trouzal. Evidon-me, da vihanañ, a zo o vont kuit.

…Klevet a reer ar gurun o strakal hep ehan.