KRISTOL a-bell
                                                     Torret em eus an nor !
Setu int, setu int, ar mestr !

ALANIG er maenhir
                                                  Mat, mat, Kristol !

KRISTOL o tisoc’h, ur sac’h pounner war e gein
Ne chom ket mui bremañ da glask ’met an trezol.

ALANIG
Allaz, allaz !

KRISTOL souezhet bras
                      Che !…

ALANIG
                                    Ha !…

KRISTOL
                                               Petra ! Ar maen !… Ar maen
a gomz !… Klevet em eus ur maen o komz diouzhin !
Ahañ !… Met nag ar mestr ?

ALANIG
                                                  Me eo, Kristol, me eo.

KRISTOL
C’hwi ! Amañ ?

ALANIG
                           Amañ ’ta !

KRISTOL
                                             Dindan ar maenhir-se ?

ALANIG
Ya.

KRISTOL
       Peseurt soñj a zo deut deoc’h, ar mestr !

ALANIG
                                                                                Emañ
An trezol etre ma daouarn, met…

KRISTOL
                                                            Met petra ?

ALANIG
’Vit ma c’hellin disoc’h gantañ, Kristol, ret eo
Lakaat ar maen bras-mañ d’n em denniñ a gostez.

KRISTOL
Ne c’hellin ket, ar mestr !

ALANIG
                                              Mont a ray e-unan.
Kemer hepken ur begad dour eus ar feunteun.

KRISTOL en ur gemer ur begad dour
Setu, ar mestr !

ALANIG
                           Azez bremañ ha chom ’vel-se.

KRISTOL, azezet war ur maen, an dour en e veg
Hun, hun !

ALANIG
                   Chom mut, ne vern petra a weli-te.