Pa zistroan war va c’hiz
E welan kalz kenvroiz,
Hag etrezo ar sakrist
’N doa va furmet da golist,
A zeske din ’pad ar goan
Katekiz goude koaniañ.
« Tonton Laou¹ » ez oa anvet
Gant kement ’oa badezet.

Dougen ’rae ur bragoù berr,
Gwech chupenn, gwech kroc’hen-ler.
A-hent-all e oa bihan,
Hag e vouezh dinerzh ha moan.
E oad a oa ar penn-kaoz
M’e c’halved ar Sakrist kozh.
Daoust d’e lagad berrwelet,
Lunedoù ne lake ket.
Souezhus oa er vemor :
Alies en e gador,
’Lâre deomp kentel ar Feiz
’N un doare ken pizh ha reizh
Ma chomemp holl estlammet
Dirak kement a spered.

    ***

Neuze ’ta, da di va eontr,
Deut an noz, e tleemp mont.
Ni a oa bugale dous,
Morse ne veze gourdrouz ;
Diskouez ’raemp d’hon mestr karet
Sujidigezh ha resped.
Pa deue d’ober e gest
E kement tiad ’oa gouest,
’Veze degemeret mat
Hag ivez trugarekaat.

    ***

Koulskoude, an den kaezh-se
Atav e peoc’h ne veve :
Ur vandennad ailhoned,
Pa veze an heol kuzhet,
’Bigne war c’horre e di
Da ober jilivari,
O leuskel diwar al lein
Da zisachañ bernioù mein,
Hon lakae da grenañ,
Meur a hini da ouelañ.
Krediñ a rae hon mestr kaezh
Ez oa an Anaon er-maez,
Hag e lâre gant kreañs :
« Goul’omp eur o delivrañs ! »

    ***

Evit ar vad graet gantañ,
E-pad m’eo bet er bed-mañ,
Ez eo bet, moarvat, gopret...
’Vit-se ’meus kement pedet !

¹ Laou Bothorel