War ar plouz

Rumm
Barzhoniezh
Yezh
Brezhoneg
Evezhiadenn
Reizhet hon eus an doare-skrivañ, ha dalc’het hon eus gant troiennoù orin (ar c’hemmadurioù, ar rannigoù, h.a.).
Sklêrijennoù
Kroaz ar Vretoned, 07/02/1915
Treuzskrivañ
Sébastien Marineau
En hevelep levr :

    e koun noz Nedeleg
    ur soudard yaouank d’e vreur bihan er gêr

Pep trouz er c’hazarn a zo kouezhet...
E korn ar gambr ma-unanig,
War un dornadig plouz gourvezet,
Ma soñj ennout, ma breur Yannig.

Kleier Nedeleg o vrañskellat
En noz don ha melkonius
A deu goustadik da luskellat
Ma huñvredigezh ankenius.

Diwar ma gwele yen ha kalet
Me az kwel en hon zi bihan,
Gant tad ha mamm, en-dro d’an oaled,
Ur pezh kef derv ’barzh an tan.

Me a wel da votoù lugernus
’Kichen ma zad er fornigell,
Gwastell edèdu ha chistr eonus
Dispaket war bank tosell ;

Ha pa deu an avel kounnaret
Er siminal da hirvoudiñ,
O soñjal en e soudard karet
Ma mamm baour o huanadiñ

Rak ar c’hoarzh, al laouenidigezh
A zo tec’het gant ar brezel ;
Nann eus fenoz ’met tristidigezh
E beilhadegoù Breizh-Izel...

O ma breurig, sent ouzh ar c’hleier !
Sav ha kerzh d’an iliz parrouz
Da bediñ ar Bugelig tener
Kousket eveldon war ar plouz.

Prestik e welo ma daoulagad
Luc’hed spouronus ar marv...
Goul’ evidon kalon en argad,
Hag al lore da zont en-dro.

Ha, goude, ’n ez kwele marellet,
Ar stalafoù klozet ervat,
Pa deuy ael an huñvre alaouret
Da reiñ dit pok un nozvezh vat,

Da vreur soudard ha da breur Jezuz
A greno gant ar baourentez :
Kousket war ar plouz a zo sklasus ;
Ro deomp kennerzh da garantez !