V Diviz

Rumm
C’hoariva
Yezh
Brezhoneg
Orin
Sant Brieg, Moulerezh Sant Gwilherm, 1909
Evezhiadenn
Reizhet hon eus an doare-skrivañ, ha dalc’het hon eus gant troiennoù orin (ar c’hemmadurioù, ar rannigoù, h.a.).
Treuzskrivañ
Sébastien Marineau
En hevelep levr :

AN AO. GARGAM e-unan
Straner milliget, na deu mui 
Pelloc’h da’m bouzara em zi !… 
Na sod oa an den dievezh 
A gredas, en ur seurt devezh, 
Reiñ da gentañ ar galanad 
Evit reketiñ bloavezh mat ! 
Gwelit anezho gwisket ker : 
Eus ur penn d’ar penn all da gêr 
Ez eont da gontañ sorc’hennoù 
Da gaout arc’hant ha banneoù ! 
 
Ur vouezh o kanañ er-maez war don 108 eus kantikoù brezhoneg Sant Brieg 
 
    O pebezh burzhud a welan 
    E Betleem pa zeredan ! 
    Ur bugel war ar plouz kousket, 
    Tost dezhañ e Vamm daoulinet ! 
 
    Ar ganaouenn ken dudius 
    Eo Nouel ar Mabig Jezuz ! 
 
Hag e kendalc’h da selaou.

 
DISKAN 
 
    Kanomp Nouel da Vab Doue 
    Ganet er c’hraou dre garantez ; 
    Da Jezuz ha d’e Vamm santel 
    Kanomp mil gwech Nouel ! Nouel ! 
 
GARGAM 
Ha ma rafen dezho donet 
Er sal-mañ da reiñ da glevet 
O c’hanaouenn a levenez, 
O nouel war un ton nevez !… 
 
Dre ar prenestr : 
 
N’hellfec’h ket donet ur pennad 
Em zi bremañ da « nouelat » ? 
 
AR C’HANER 
Eo, eo, gant plijadur, aotroù !… 
 
Sevel a reont. 
 
GARGAM 
Ganto n’eus ket a sorc’hennoù, 
Met un nouel ken dudius 
En enor d’ar Mabig Jezuz 
Am laka meurbet evurus ! 
Deu’t tre, bugaligoù doujus !