Me ’gar va Breizh-Izel

Rumm
Barzhoniezh
Yezh
Brezhoneg
Orin
Sant Brieg, René Prud’homme, 1905
Evezhiadenn
Reizhet hon eus an doare-skrivañ, ha dalc’het hon eus gant troiennoù orin (ar c’hemmadurioù, ar rannigoù, h.a.).
Treuzskrivañ
Sébastien Marineau
En hevelep levr :

    d’an Ao. Loth, dean skol veur e Roazhon

Me ’gar va Breizh-Izel ! va mamm vat, va bro gozh,
He deus e pep amzer kaset d’ar Baradoz
Bugale kalonek, rouaned, sujidi,
Barzhed, menec’h, gwragez, hag a gare pediñ !

Me ’gar va Breizh-Izel ! Mamm-Vro Marzhin, Lez-Breizh,
Arzhur, Gwesklin, Gradlon, ha re all c’hoazh a-leizh,
Marc’heien, tud a vor, a reas enor d’o bro,
Oc’h he difenn bepred betek pred ho marv...

Me ’gar va Breizh-Izel ! gant he ilizioù kozh,
Kouentoù santelaet gant pedenn deiz ha noz,
Kroazioù dantelezhet, tourioù uhel savet,
Mein-hir ha taolioù-maen, enni dre-holl hadet !

Me ’gar va Breizh-Izel ! kelc’het brav gant ar mor,
Goloet a vagoù, o gouelioù gwenn digor ;
Me ’gar he fradeier, krec’hennoù ha koadoù,
Gant o mesaerien o kanañ forzh sonioù !...

Me ’gar va Breizh-Izel ! o vriata ar groaz,
Oc’h he sankañ bemdez war ribl an hentoù bras,
Me ’gar va Breizh-Izel ! o tifenn madoù sakr,
Betek ar gwad zoken, enep an dud fallakr.

Me ’gar va Breizh-Izel ! evel ur berlezenn
O lintrañ, skedus-bras, dirak dremm an estren ;
Gallout a reer gwelet e pevar c’horn ar bed
Pobloù a-bezh n’o sav, ouzh va Breizh o sellet...

Me ’gar va Breizh-Izel ! me ’gar va c’henvroiz,
A zalc’h d’o Brezhoneg, ’vel ma talc’hont d’ho feiz ;
Me ’gar an dud dispont en em gann er brezel
Brezel garv-meurbet d’hon holl giziom santel !

Me ’gar va Breizh-Izel ! me he c’haro atav !
Va c’halon eviti da viken a lammo ;
Betek pred va marv kalonek me ’gerzho
War roudoù va zud kozh... Breizh-Izel ra vevo !...