IV Diviz

Genre
Théâtre
Langue
Breton
Source
Rennes, Francis Simon, 1907
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

AR BUGEL-NOZ, an daou vezvier kousket, AR C’HORNANDONED

Ar bugel-noz o tont eus a-dre kein ar maen-hir, a gan war don Me eo Mathurin an Dall, e Kanaouennoù Kernev, p. 46.

    Noz dall eo, kornandoned,
    Deredit ’ta, paotred.
    Noz dall eo, kornandoned,
    Deredit ’ta, paotred.
    Deredit a bep tu,
    Hastit afo deredet
    Hag e raimp un dro-zañs
    Ouzh sell ar stered ! Geo !

Ober a ra ur sutadenn hag ar c’hornandoned a zilamm a bep tu war leurenn an teatr. Goude ur pennad mont-dont warnezhañ ec’h en em lakeont da zañsal en ur ganañ ar ganaouenn-mañ tennet eus Kanaouennoù Kerne, p. 168, gant aotre an Aotroù Jezegou a zalc’h gwirioù an oberour.

        DISKAN
    Dañsomp, paotred,
    Dañsomp d’ar red,
    Dañsomp, fringomp, kornandoned.

        I
    Dal a unan !
    Prim a droad, paotred.
    Dal a unan,
    Dañsomp buan,
    En em veskomp
    Holl etrezomp
    Ken na baro an heol warnomp.

        II
    Ha dal a zaou !
    Prim a droad, paotred.
    Ha dal a zaou,
    Mat ez a an traoù.
    Dañsal en noz,
    Holl diaouloù kozh,
    Setu eno hor baradoz !

        III
    Ha dal a dri !
    Prim a droad, paotred.
    Ha dal a dri,
    Sachomp warni
    An noz teñval
    A zo brav-ral ;
    Deomp-ni da c’hoari, da zañsal.

        IV
    Dal a bevar !
    Prim a droad, paotred !
    Dal a bevar,
    Hejomp hor gar
    Pa vez arnev
    Da reiñ dour bev
    Gant an higenn pesked a deu.

        V
    Ha dal a bemp !
    Prim a droad, paotred.
    Ha dal a bemp,
    Brav ’z-a ganeomp
    Meurzh an evned
    a oa bepred
    An deiz ’rall da douzañ ’n denved.

        VI
    Ha dal a c’hwec’h !
    Prim a droad, paotred.
    Ha dal a c’hwec’h,
    Sachit ganeoc’h
    Ar c’horaiz
    Deut war e giz,
    Ne dalv netra gant e soubenn piz

        VII
    Ha dal a seizh !
    Prim a droad, paotred.
    Ha dal a seizh,
    Gwell eo kig preizh
    Pa ve ’n deñved
    Dishualet,
    ’Vezont re ampart da gerzhet.

        VIII
    Ha dal a eizh !
    Prim a droad, paotred.
    Ha dal a eizh,
    Stardomp hor preizh
    Un droig c’hoazh
    Bihan ha bras,
    Hag e tihunimp an daou c’hoazh.

        IX
    Ha dal a nav !
    Prim a droad, paotred.
    Ha dal a nav,
    Dañsomp atav
    Graet eo ar stal ;
    Kerzhomp raktal
    D’an ifern da echuiñ ar bal.

Amañ unan eus ar vezverien a ra an neuz da zihunañ, hag ez eont kuit.

AR BUGEL-NOZ, a gan war don Bosenn Elliant (Barzhaz Breizh)

        I
    ’Meus aon n’int ket dihunet mat,
    Distroit ’ta c’hoazh ur pennad,
        Ur pennad c’hoazh,
        War-dro ’n daou c’hwaz,
    Distroit ’ta c’hoazh ur pennad.

        II
    Kanit dezho ur sonig vrav,
    D’o divezviñ kanit o nav,
        Kornandoned ;
        D’ar red, d’ar red,
    D’o divezviñ kanit o nav.

AR C’HORNANDONED HOLL A-UNAN, war don Evnig a gan er c’hoad uhel (Barzhaz Breizh)
    Ya ! Ya ! Kanomp a-bouez hor penn
    Ken na gouezhimp war an dachenn ;
    Kanomp holl ken na dregerno
    An holl heklevioù tro-war-dro !

UNAN EUS AR C’HORNANDONED, war don Merzhin en e gavell (Barzhaz Breizh)

        I
    Ne son ket c’hoazh an Añjeluz
    E chapel ebet tro-war-dro ;
    Ar c’hornandoned ’vo eürus
    Ken na savo an heol warno. (2 wech)

        DISKAN
    Chut ! Chut ! Na rit ket trouz ebet,
    Peoc’h ha repoz d’ar re gousket,
    Peoc’h ha repoz e-pad an noz
    D’ar vezverien geizh dianket (2 wech)

        II
    An eostig-noz en deus kanet
    En draonienn c’hlas e vravañ poz
    Da luskellat an douar kousket ;
    Kanañ a ray e-doug an noz (2 wech)
 

       III
    Kouskit, kouskit, ken na savo
    An heol war ar menez gwenn-kann ;
    Kouskit, kouskit, ken na gano
    Ar c’hilhog skiltr e beg al lann.

UNAN EUS AR C’HORNANDONED
Met… n’eus moien ebet d’o dihunañ.

UN ALL
Ar chistr en deus stanket o diskouarn.

UN ALL
Marteze ez int marv.

AR BUGEL-NOZ
Nann, va bugale, n’int ket marv, met ho kanaouennoù a zo ken brav ma chalmont anezho e-lec’h o dihuniñ.

UR C’HORNANDON
Lavaromp c’hoazh eta ur ganaouenn all dezho ha, ma ne zihunont ket er wech-mañ, ni ’ouezo petra d’ober.

AR C’HORNANDONED HOLL A-UNAN, war don Tour an Arvor (Barzhaz-Breizh)

        I
    Ma n’eo ket c’hoazh deut ar marv, – tudoù,
    Da sonnañ deoc’h hoc’h izili,
    Dihunit hag hastit afo
    Klask an hent ho kaso d’ho ti.

        II
    Ma tisentit ouzhomp a-grenn, – tudoù,
    Ar bleiz-noz hep mar ho tebro ;
    Hep kloc’h, na beleg, na pedenn,
    Hennezh emberr hoc’h intero.

        III
    Ar c’hornandoned n’int ket drouk, – tudoù,
    N’ho pezet aon ebet razo,
    N’ho prañsellint ket ouzh ar groug ;
    Dihunit hag it hoc’h hentoù.

Kerkent ha m’eo echu o c’han, e tihunont an daou vezvier en ur reiñ dezho taolioù-dorn hag ez eont kuit en ur c’hoarzhin, ar bugel-noz war o lerc’h.