VII Diviz

Rumm
C’hoariva
Yezh
Brezhoneg
Orin
An Oriant, Le Bayon-Roger, war-dro 1912
Evezhiadenn
Adaozet hon eus ar Brezhoneg Gwened diouzh doare KLT.
Treuzskrivañ
Sébastien Marineau
En hevelep levr :

Kanañ a reer a bell.

AR GANERION
Na dousaet eo an avel-noz — an avel-noz !
Kornandoned, digouskit holl — digouskit holl !
Na dousaet eo an avel-noz — an avel-noz !
En-dro d’ar maenhir deu’t da g’roll,
Kornandoned, setu kreiznoz !

Klevout a reer kreiznoz o seniñ.

A-dehoù, dousig : Tihou ! Tihou ! Tihou !… Hip !

Ur c’hornandon a sailh war al leur-c’hoari.

A-gleiz, dousig : Tihou ! Tihou ! Tihou !… Hop !

Ur c’hornandon arall a ra ar memes tra.

Int ’n em sell hag a lâr o daou war un dro : Ha !
O daou : Deu’t ta ! Deu’t ta ! Deu’t ta ! Deu’t ta !
Unan : En-dro deomp n’en deus ket hini.
An arall : ar vistr* ’omp, ya, ar vistr ’omp-ni !  [KLT ar vistri] 
O daou : Deu’t ta ! Deu’t ta ! Deu’t ta ! Deu’t ta !

Ar c’hornandoned a zisoc’h a-gleiz hag a-zehoù war al leur-c’hoari hag, hep kanañ, a g’roll, e-pad m’en deo an orglezioù o c’hoari hag en un taol int en em dolp en-dro d’ar kaezh Kristol en ur ganañ :

          Ha ! Ha ! Ha ! Ha !
          Piv eo enta
          Ar c’housker-mañ
     Ha ne oar ket lâret netra ?

          Ha ! Ha ! Ha ! Ha !
          Piv eo enta
          Ar c’housker-mañ
     Kouezhet eus al loar er c’hoad-mañ ?
          Piv ’out-te ? Piv ’out-te ?

UR C’HORNANDON
          Komz pe’tramant
     Ni a gredo emañ rekis
          Galviñ ar sant
     Evit digloz da deod-dit*.  [W dis]

KRISTOL
Galviñ ar sant ! Perak ? Pas, pas, n’her galvit ket.
Prest ’on da gas en-dro ar pezh am eus laeret.

AR C’HORNANDONED
          Ha ! Ha ! Ha ! Ha !
          Ul laer ’out ’ta !
          Ret e vo dit*,  [W dis] 
     Mar vennez gouarn da lod a varadoz*  [W varadouiz] 
          Kas en-dro an arc’hant d’an hini e piaou.

KRISTOL
Met d’ar sant int !

AR C’HORNANDONED
                                Petra ?

KRISTOL
                                             Ar relegoù.

AR C’HORNANDONED
                                                                 Ar relegoù !

KRISTOL
    Laeret em eus… Hor bezet truez !
    Relegoù Sant… Sant Gwenole !

AR C’HORNANDONED
    Laeret en deus ar relegoù !
    Milliget eo, milliget eo !

KRISTOL
    Ho pet truez ! Ho pet truez !

AR C’HORNANDONED
          O douar, ’n em zigorit,
    ’Vit lonkiñ, hep truez ebet,
    ’Vit lonkiñ al laer milliget.
          Ha ! Ha ! Ha ! Ha !
          Ul laer ’out ’ta,
          Ret e vo dit*  [W dis] 
    Mar vennez gouarn da lod a varadoz*  [W varadouiz] 
    Kas en-dro da chapel ar sant e relegoù.

Razh ar pezh a zo a-raok, a-dal ar gerioù « Na dousaet eo an avel-noz » a zo kanet, hervez musik an Aotroù Decker.

KRISTOL, a gomz
Setu int, tudchentil, kemerit int, m’ho ped,
Kasit int, e m[a] lec’h, d’ar sant am eus laeret.
Re a aon am eus-me eus her gwelet, ken gwenn
’Vel an erc’h, war bavez ar chapel o tiskenn.
Kounnaret, ’vit faoutañ, gant e vazh houarn, ma fenn.
Gwell e vefe ganin, sellit, mervel a-benn.

AR C’HORNANDONED, a gan
          Ha ! Ha ! Ha ! Ha !
          Alleluia !
          Deomp-ni enta,
    Tra m’en deo c’hoazh noz er c’hoadoù.
          Ha ! Ha ! Ha ! Ha !
          Alleluia !
          Deomp-ni enta,
    Da gas d’ar sant e relegoù !

Frrrr…t ! Mont a reont kuit gant ar sac’h relegoù.