an Nevez-Amzer

Genre
Poetry
Language
Breton
Source
Sources are peculiar to each text.
Notice
The spelling has been modernized, but some forms (mutations, verbal particles...) has been kept.
Transcription
Sébastien Marineau
In the same work :

Aet eo ar goañv kalet en e doull du bremañ ;
Ar skorn, ar grizilh, an erc’h en deus kaset gantañ ;
Digor eo ar mammennoù, hag an dour sklêr a red
Er stêrioù hag er pradoù, glas eo ar geot, an ed.

An heol a darzh, beure mat, lugernus ha laouen,
Ha kerkent ar bleunigoù a drid, a sav o fenn ;
An holl labousedigoù e-tal o neizh a gan ;
Breizh ker, pegen brav ’out-te, gant dudi ez kwelan.

Displegañ ’ra kalz delioù war ar strouezh, ar gwez,
Bet o deus digant Doue forzh dilhadoù nevez ;
A bleuñv-lann, ar bleuñv-balan war ar maezioù a sked,
En o zouez deñvedigoù a fring evel pesked.

Ar spern hag ar gwez-aval, ’vel an erc’h a zo gwenn ;
Diwezhatoc’h, gant o frouez, e plegint holl o fenn ;
Avaloù kalz a vezo, ar gwin melen fonnus,
Ha ganeoc’h, ma c’henvroiz, ar stok gwer dudius.

Deuet eo ar gwennili, d’ober predoù kelien,
Da stagañ en ur c’hornig e neizhig pri kempenn ;
Ar big, ar vran, ar gegin a oar kroaziañ sparloù
War ur skourr uhel ha bresk da c’horiñ o vioù.

Ar goukoug, debrer preñved, gant e floc’hig bihan,
Eus an eil gwezenn d’eben e anv brav a gan ;
O vezañ m’eo didalvez, e oar mont da zezviñ
E neizh an evned munud, hag o lez da c’horiñ.

War grab ar c’harzh, oc’h heoliañ, e c’hoari ar glazard,* [al loen-stlej] 
A-us dezhañ, er wezenn, e richan ar glozard*, [an evn] 
An naer-galet, ar wiber, rodellet da gousket,
A za kuit en ur fic’hañ raktal m’int dihunet.

Ar c’hilhog, en ur rodañ, kendroet gant e yer,
A gerzh er gwenodennoù, ’vel ur priñs ouesk ha taer
Prest atav d’en em gannañ. Ma na vez ar roue
E stourmo hag e trec’ho, kanañ ’raio goude !…

E korn ar prad dourennek, war ur plankenn gwintet,
Diarc’hen, ar mevel bras a droc’h ur bec’h geot med ;
War-laez ar feunteun vihan a zo en e gichen
Eo deuet da evañ dour ar voualc’h beg melen.

En tu all, war grab ar roz, e weler an alar
Oc’h ober ervennoù heiz gant he bommoù douar,
Ar piked hag ar brini a zebr ar preñved gwenn
A za da chwiled-derv hag a fraoñv en dervenn.

Ar binioù a glevan e traoñ-park ar c’houldri,
Ar mesaer zo eno gant ar saout o peuriñ ;
D’an heol, a za da gousket en e wele seiz ruz,
Heklev Breizh-Izel a gas an hini gozh diouzhtu.

Mouezh skiltr ar vugaligoù, o c’hoari en hent glas,
P’eo deuet ar pardaez, a-bell, a glevan c’hoazh,
Ha kan al labourerien, o tont, dre an hent moan,
War-eeun d’ar vereri gozh da zebriñ yod d’o c’hoan.

Tud ha loened zo lirzhin ; ar bleunioù hag ar gwez
A zo distro, gant Jezuz, adarre d’ar vuhez ;
Plegañ ’reont d’al lezenn a zo roet dezho…
Heuliomp holl ar gourc’hemenn ha greomp evelto !…