Perak e kanan

Genre
Poetry
Language
Breton
Source
Sources are peculiar to each text.
Notice
The spelling has been adapted from Brezhoneg Gwened to KLT standard.
Further details
Dihunamb, 1923, p. 248
Transcription
Sébastien Marineau
In the same work :

Digor eo miz ar bokedoù*,    [W boketeu]
Emañ er bod spern-gwenn e bleuñv* ;    [W bleu]
Met n’en deo ket e vlev gwenn eo
A ra da’m c’halon levenez.

Er c’hoad bras an evned a gan
Kanennoù gaer kenti-kentañ ;
Met n’en deo ket o c’han kaer eo
A ra da’m c’halon levenez.

Ken sklentin eo son ar c’hleier
Ma tasson en aod ar reier ;
Met n’eo ket o son sklentin eo
A ra da’m c’halon levenez.

Ma c’halon newazh zo bleuniet,
Bleunietoc’h ’vit bleunienn ebet,
Ma c’halon baour newazh a gan
Gwivoc’h ’vit an evned d’an hañv.

Ma c’halon baour, lâr te din-me,
Lâr din perak e kanez te,
Perak e kanez te hiriv
Ken brav, ken flourik ha ken gwiv.

– Te c’houlenn perak e kanan
Gwivoc’h ’vit an evned d’an hañv,
Perak e kanan-me hiriv
Ken brav, ken flourik ha ken gwiv.

An neb zo karet hag a gar
A zo er baradoz war zouar ;
Me zo karet, kariñ a ran,
Er baradoz en em gavan.

Me ’gar Jezuz ha karet ’on
Gant ma Jezuz, roue ma c’halon ;
Jezuz hag am c’har a garan
Ha setu perak e kanan.