Pell eus Breizh-Izel

Rumm
Barzhoniezh
Yezh
Brezhoneg
Orin
Da bep testenn e vammenn
Evezhiadenn
Reizhet hon eus an doare-skrivañ, ha dalc’het hon eus gant troiennoù orin (ar c’hemmadurioù, ar rannigoù, h.a.).
Treuzskrivañ
Sébastien Marineau
En hevelep levr :

    D’an aotroù Born, person Gwiskriv
    Ton : Evit bevañ gant levenez

Pell eus a Vreizh, ma bro garet,
Setu me pell amzer dalc’het ;
Bevañ ’ran e-mesk tud estren
Hep joa na darempred gant den :
O ! pet gwech endeo ma selloù
A sav gant hiraezh d’an neñvoù !
Rak er bed-mañ an divroet
Allaz ! ’ve e-unan bepred.

Tro ’n noz, pa welan, ’n un dremen,
Ur bouilh moged ’us d’ul lojenn,
Me ’lâr : Nag eürus an hini
En deus d’e zegemer un ti,
Un ti ha tommder un oaled
’Vit e gerent, e vignoned !
Rak er bed-mañ an divroet
Allaz ! ’ve e-unan bepred.

Na dous ’ve dihun da vintin
Deoc’h mouezhioù ar c’hleier sklentin ;
Na dous ’ve selaou, dous-meurbet,
Richanoù drant al laboused !
Met evned ha kleier laouen
A lez va c’halon sec’h ha yen :
Rak er bed-mañ an divroet
Allaz ! ’ve e-unan bepred.

O ! na hetus a ve gwelet
Ar bokedi ken brav livet,
A stivelloù a red ken sklêr
Kamm-digamm dre ar pradeier !
Ya, mar gomzfent a Vreizh-Izel
E-lec’h am eus bevet bugel !
Met er bed-mañ an divroet
Allaz ! ’ve e-unan bepred.

Kaer e kavan ar c’hoadoù-vod,
Ar gwagoù-mor war an tornaod,
Ar menezioù pignet o fenn
Uheloc’h ’vit ar goumoulenn :
O gwel a ra din melkoni,
Ouzh re ma bro ’mije dudi !
Rak er bed-mañ an divroet
Allaz ! ’ve e-unan bepred.

En-dro din, me ’wel manerioù,
Kêrioù leun-holl a vurzhudoù,
Ilizoù koant, tourioù uhel
Er bevar c’horn eus an dremmwel :
Ha ma soñj zo gant ma broig
’Lec’h n’eus ket traoù ken pinvidik !
Rak er bed-mañ an divroet
Allaz ! ’ve e-unan bepred.

Dre-mañ, e kêr hag er maezioù,
Me ’wel diduell er gouelioù :
Kozh ha yaouank a ve seder,
A bep anken tre-dibreder ;
Mar dremenan, holl ’vo seven,
Met den e zorn din ne astenn !
Rak er bed-mañ an divroet
Allaz ! ’ve e-unan bepred.

Piv ’rento din va Breizh-Izel,
Bro ma c’halon, bro ma c’havell,
Bro va mignoned, ma c’herent,
Bro an dud leal, bro ar sent ?
Pell diouti ne ran ’met leñvañ,
Pell diouti n’hellan ket bevañ :
Rak er bed-mañ an divroet
Allaz ! ’ve e-unan bepred.

Te, koulmig c’hlas, evn tremeniad,
Nij da Lanveg da gas kannad
Ez eo ma buhez re c’hwerv,
Hag e varvan gant droug-ar-vro :
Lâr da’m c’henvroidi karet
War ma roudoù na zeufint ket ;
Gwell eo bevañ, gwell eo mervel
En o farrez a Vreizh-Izel !