III

Rumm
C’hoariva
Yezh
Brezhoneg
Orin
Sant Brieg, Moulerezh Sant Gwilherm, hep bloaziad
Evezhiadenn
Reizhet hon eus an doare-skrivañ, ha dalc’het hon eus gant troiennoù orin (ar c’hemmadurioù, ar rannigoù, h.a.).
Treuzskrivañ
Sébastien Marineau
En hevelep levr :

    E ti an aotroù Bidoch

    AN AO. BIDOCH o vale en e gambr. Yann a sko war an nor

Piv zo ?… Deuit en ti.

    YANN

Devezh mat deoc’h, aotroù Bidoch ! Deuet ’on da zigas deoc’h a berzh an aotroù Pendolog, va mestr, peadra da ober un tamm fest evit meurlarjez. (Yann a ro al lizher hag a laka e baner war an douar.)

    BIDOCH

Ha ! Yann, te a zo ur paotr kalonek, ha da vestr eo ar gwellañ eus an holl vignoned. (Al lizher a lenn uhel.)
« Va mignon ker, ur blijadur vras eo evidon gellout kinnig teir c’had dit. An dra-se a ziskouezo pegen evurus eo bet va abadenn chaseal. Krediñ a rafen ober gaou ouzh hor mignonaj kozh o chom hep kas dit peadra da ober evit meurlarjez un tamm lip-e-bav… Lavar da Gatell lakaat he holl ouiziegezh da ober mat ar geusteurenn. Da vignon kozh, Pendolog. »
Gwelomp ’ta ar gedon kaer-se.

    YANN oc’h astenn e baner

Dalit, aotroù, setu i amañ.

    BIDOCH o tigeriñ ar baner, ne gav nemet div c’had

Met, va faotr, ne welan nemet div, ha koulskoude, al lizher a gomz din a deir c’had.

    YANN

Ya, aotroù, teir c’had.

    BIDOCH

Met, n’eus nemet div c’had ez paner.

    YANN

Ya, aotroù, div c’had.

    BIDOCH

Ac’hanta, al lizher am eus lennet bremaik dirazout a gomz a deir c’had.

    YANN

Ya, aotroù, teir c’had.

    BIDOCH

Ur wech c’hoazh, e-lec’h teir, ne welan nemet div.

    YANN

Ya, aotroù, div c’had.

    BIDOCH

Azen diot ma’z out, e-lec’h teir n’ec’h eus nemet div.

    YANN

Ya, aotroù, div c’had.

    BIDOCH

Anzav fraezh din ez poa teir c’had da zigas a berzh va mignon.

    YANN

Ya, aotroù, teir c’had.

    BIDOCH

Teir a leverez ! E pelec’h emañ an deirvet rak n’ec’h eus aze nemet div hepken ?

    YANN

Ya, aotroù, div c’had.

    BIDOCH

Met, sac’h an dien ! ne ouzout na sou na dic’ha ! N’eo ket div eo, pa lavaran teir.

    YANN

Ya, aotroù, teir c’had.

    BIDOCH o skrivañ

Ro peoc’h din, genoù tartez ! rak sotoc’h ’out eget ar botoù a zo ez treid. Dal, ro al lizher-mañ da’m mignon Pendolog. Selaou c’hoazh ac’hanon. Mar kavez pe mar klevez e ve, en un tu bennak, spered ha skiant da werzhañ, e rafes mat prenañ da lod… ezhomm ac’h eus.

    YANN

Kenavo, aotroù, ha yec’hed mat deoc’h (Ez a kuit.)

    BIDOCH

Pebezh genaoueg ! pebezh diod ! ne ouzon ket penaos va mignon Pendolog a c’hell derc’hel en e di ur banezenn evel hennezh.