200.000 livr aour da zastum a vec’h rastell

Genre
Poetry
Language
Breton
Source
Morlaix, A. Chevalier, 1885
Notice
The spelling has been modernized, but some forms (mutations, verbal particles...) has been kept.
Transcription
Sébastien Marineau
In the same work :

Nag a bet a glever bemdez oc’h hirvoudiñ
War bilig ar mizer ’zo kouezhet en o zi,
Hag a chom ’vel peulioù, pa n’o deus ’met plegañ
Evit rastellat aour ’leizh ar wazh o ruilhañ !

Un den mat eus Stirling, Bro-Skos, ’lavar deomp-ni
An Aotroù A. Cadot, ’zo pastor e Chauny,
O vezañ skuizh moarvat gant e sac’hadoù aour,
’Neus laket en e benn reiñ un toullad d’ar paour.

Pemp mil lur warn ugent a ginnig d’an hini
’Ziskouez dre ar Skritur ’dleomp pediñ Mari :
’Gavo en Aviel ul lec’h bennak anat
O lavarout a c’hell Mari hon sovetaat.

Pemp mil lur warn ugent e ro d’an den gwirion
’Zic’houel er bibl penaos gwin ar gomunion
A dle bezañ lipet gant ar beleg hepken
Hag e ve un dra fall e reiñ da bep kristen.

Pemp mil lur warn ugent d’ar mestr pe d’ar vestrez
’Zic’houel en Aviel e oa Per dizimez ;
Pe ’gavo er Skritur ur versed pehini
’Lâr eo krak difennet d’ar beleg dimeziñ.

An holl a oar hon eus dirak tron an neñvoù
Un avokad santel evit hon pec’hedoù ;
Pemp mil lur warn ugent ’ginnig da neb a c’hall
Diskouez, dre ar Skritur, ’zo unan bennak all.

Ar Romaned a dou eo bet Per eskob Rom.
A-raok ma kredo se ur ger ’ra bras ezhomm.
Pemp mil lur warn ugent gantañ zo kinniget
Da neb e zic’houelo er Skritur benniget.

Te p’hini a gemer ar pap evit vikel
Jezuz-Krist er bed-mañ, dic’houel, ma faotr, dic’houel
E Testamant Nevez ur ger a lavar se,
Pemp mil lur warn ugent az pezo hepdale.

    ***

Birviken n’ez on bet gwall dechet d’ar fortun,
Rak anez n’em bije lezet tro da nikun
Da redek an hini ’zo kinniget amañ
Ha da un tamm begek ’gousto nebeud a dra.

    ***

Nag a dud, va Doue, ’zirollo da c’hoarzhin
P’arruo deiz ar pae e palez paotr Stirlin[g] !
Eno ’vo jabadao etre an azened
O c’houlenn ar butun ’gavfont bout gounezet.

Met hemañ sioulik-ker, hep mar a lavaro :
« Mantret ’on d’ho lezel da vont gwennik en-dro
Va dineroù zo mat, met ho c’hoari zo fall
Pa ’po c’hoant da c’hounit, klaskit kentoc’h un dall. »