un Dro vale en Ifern

Genre
Poésie
Langue
Breton
Source
Morlaix, A. Chevalier, 1885
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

Darn a weler touzet gant ar falz Purgator.
War gement-se ’meus graet ur pennadig istor.
Rak aon ouzh an ifern darn all zo o vougañ ;
Ur gomzig d’ar re-mañ ’meus mall da zisplegañ.

« Petra, ma mabig paour, petra ’maout aze c’hoazh,
Hep bezañ furaet tamm ? Birviken na vi gwaz. »
Biken ! Klevout a rit-hu pezh a lâre an tad,
Hast gantañ da welet e baotr ober neuñv12 vat ?

« Kemennet em boa dit tregont vi houadez…
Hen hadet ’c’heus war hent Tremel da Vontroulez ;
N’eo ket plijet ganez dougen ervat da vec’h…
Kerzh adarre en-dro, distro da foar an nec’h. »

Koulz skeiñ war ar c’herreg ha krial « tadig kaezh » ;
An nor zo morailhet, Yann zo e fri er-maez.
Dispak e viou, ne gav, en distro, nemet nav !
Me ’vo ’ta emezañ, ur sodig-nay atav !

– Ya mab, n’az po netra ’vit labour hanter graet ;
Hen gas da benn zo ret abred pe ziwezhad.
Arabat dit anez huñvreal plijadur…
Amañ pe e lec’h all ’ranker reiñ ar muzul.

Setu aze, ma faotr, petra eo an ifern :
Atav, atav, atav lammat e-kreiz ar spern,
Gouzañv, leskiñ eta an naon hag ar sec’hed,
Keit amzer ma vezimp mignoned d’ar pec’hed.

    ***

Met neuze, pep hini, pa ’neus ifern ebet,
’C’hell c’hoari he dampaotr ? – Hola kamaladed…
Dalc’hit ho troad er pal ; a-dreñv an arvezioù,
Rak ho pet soñj, ar Mestr ’zalc’h kont pizh eus ho vioù.

    ***

An ifern zo toet a c’hoantegezhioù kleuz.
Dispignet ho tanvez, ho yec’hed, mar hoc’h eus ;
’Vit an Aotroù, c’hwi ’oar n’ez eus na deiz na noz ;
Dre-se e vadelezh ’plij ganti o gortoz.

Dastumit ’ta, mar plij, holl pabed hoc’h ifern
E pelec’h hon stlapit ’vel sac’hadoù eskern.
C’hwi ’mezon-bras a zo boazet da c’hwezhañ tan
Ha da c’hoari sach blev gant ho komper Satan…

It eta, kanfarded, hoc’h-unan da gentañ
Da ziskouez deomp penaos e fell deoc’h hon rostañ.
Mar geo brav ar c’hoari, c’hwi her gemenno deomp,
Goude ni ’n em denno en doare ma garfomp.