Fontanella (4)

Genre
Poésie
Langue
Breton
Source
Paris, Didier et Cie Libraires, 1867
Remarques
Nous avons modernisé l’orthographe tout en conservant certaines tournures d'origine (mutations, particules verbales...).
Transcription
Sébastien Marineau
Dans le même ouvrage :

    IV

Re Bariz a oa souezhet,
O c’houzout petra oa degou’et,
Gwelet un itron a bell vro,
Trouz bras ganti, dre ar ruioù.

– Setu pennhêrez Koadelan
Ganti ur sae c’hlas ha ledan ;
Ma c’houfe pezh a ouzon-me,
Ur vrozh du-peg a gemerfe.

– Aotroù roue, ha me ho ped,
Ma fried din-me daskoret*.    [daskorit] 
– Ho pried deoc’h ne zasin* ket,    [LV rendrai] 
Tri deiz zo emañ bet torret. –

Neb a zeufe da Goadelan,
En defe kañv ha nec’hamant,
En defe kañv bras o welet
Marv an tan war an oaled.

O welet al linad kreskiñ
E toull an nor hag el leur-zi
El leur-zi hag e-kreiz ar sal,
Hag an dud fall eno ’vragal ;

Hag an dud paour, en un dremen
Oc’h ouelañ, siwazh, gant anken,
Oc’h ouelañ, o komz evel-henn :
– Setu marv mamm ar beorien ! –