Me a soñj din avat ez on o huñvreal !...
Penaos, Breton, te a garfe bout digabestr
Ha dieub ? ha terriñ va nerzh hag an hual
A zo stag ouzh da dreid ? Hola !  dit me zo mestr.

Selaou mat kement-se, o den rust ha dibenn !
Ya, dit me a zo mestr ! ha din te zo mevel !
Diragon serr da veg ha pleg izel da benn
Ha dilez ’vit va heuilh kozh douar da gavell !

Dilez ’vit va servij pried ha bugale !
Ha kerzh da vrezeliñ evidon hepdale
Er broioù gouez marvel evit kreskiñ va gloar !

Goude, mar bez bev c’hoazh, me az rekompañso
’Vel m’eo dleet en ur... brometiñ dit al loar !
Ha muioc’h en ez Preizh, muioc’h, me az preso !

          Du 1911