Ho tisheol a glaskan, o koadoù kozh derv !
Evit gouelañ e peoc’h... rak an Anken euzhus
He deus, hep trugarez ebet, rannet garv,
Siwazh ! va c’halon a ozac’h karantezus.

Warlene c’hoazh, bemdez, pleget war an erv,
Me a gane dinec’h ! me a gane trouzus !
Bremañ n’ez eus ganin ’met garmoù ha daeroù,
’Met huanadoù yen ha klemmoù truezus.

Bremañ ez on heñvel ouzh ur paour diskiant.
Pep youl a zo marv ennon koulz ha pep c’hoant
Ha nebeut-ha-nebeut ar vuhez am c’huita !

Kement-se holl ab’oe an deiz meurbet iskis
M’eo bet c’hoar va ene, va fried, va Maria,
Falc’het gant an Ankoù e-kreiz he yaouankiz.

          Ebrel 1905